Sunday, March 19, 2006

想炒「環保」?買中石化!

全國政協同埋人大會議相繼閉幕。祖國中央政府今次乘機向兩岸四地的人民,解釋未來會推行的政策。傳媒自然將焦點放在兩岸問題上,雖然這個問題由一九四九年到依家都未解決,不過都唔好話無變數,唔好唔值得關注。

如果兩岸有乜易郁打起上來,台北食飛彈,我哋香港,作為祖國首屈一指的城市,亦必然會食飛彈,又如果到時添馬艦已經變成政府總部,一支巡航導彈,就可以擺平解放軍,國務院,同埋我哋特區政府駐港總部。作為特區人民,都唔好話唔驚,唔知民建聯係唔係收到「內部」memo,有先見之明提出要「遷都」到九龍。

當然,孫柏文個隻金手指,都希望從政協人大會議中提過的新政策方向,為大家篤一個投資機會。兩岸問題實在太多變數,金手指都諗唔到從那個角度去提供投資建議,只不過希望天下太平,阿彌陀佛!反而孫柏文覺得最有投資價值的新政策,就是領導人對環保的方向。

多種跡象顯示,祖國今次對環保真係好認真。孫柏文成日話,如果將政府比喻成為一家之主,政策是分三大層面。第一層係國防。打個比喻,如果有人爬入你屋企,揸支槍對主你家小,你第一時間梗係諗點樣可以趕走個賊,仲邊會有人心情諗下一餐開唔開到飯?

再提升一個層面。當個賊走左,屋企又換埋新鎖,不過你無工開,擔心下一餐開唔開到飯,你係唔會閒情去管人你(的)「二手煙」,更加唔會諗究竟十年八年之後會否會令家人帶來癌症。第三層,當你步入小康,開始可未來計劃,你同屋企就會開始擔心「二手煙」危害健康。

世界各國的環保運動,都是國家去到第三層的發展階段,才有足夠的國民支持得而成功。祖國經過多年來的經濟發展,應開始進入第三層的發展階段。 中央政府政策軍火庫內,對促進環保確實有一個強大武器,就是「能源價格市場化」。

現在電油、柴油、電力都是控制在市場價格之下,令到短缺、浪費、排對等市場失調症狀出現。如果能源價格可以提昇到市場價格的程度,中央政府便可以利用「貪錢」商人希望增加成本效益的動力,去達成環保這個目標。最後給讀者一個投資建議,如果石油副產品價格因環保市場化,最大得益者必是中石化(386)。所以想炒環保概念,一定要買中石化。

No comments:

Post a Comment