噚日，孫柏文學到一次沉重嘅教訓。大家可能會問：「係唔係因為噚日H股指數升咗293點，所以教訓就係千祈唔好學孫柏文咁，叫人買認沽證put輪？」錯！噚日，我學到嘅教訓就係千祈唔好一路睇民建聯啲政策建議，一路飲水。如果大家唔從我學到嘅教訓中學習，結果只會令大家有一對滴緊水嘅鼻孔，同埋一本濕晒水嘅建議書。
大家可能會問：「噚日民建聯出咗啲乜嘢新建議，令孫柏文睇 睇吓鼻孔噴水？」首先，唔好講乜嘢低B建議令我噴水住，我想講吓一開始睇本建議書嘅感覺。噚日，我喺公司嘅飯堂食咖喱雞飯，周圍有好多靚女同事用膳。我作 為一個非常怕醜嘅人，當然盡量諗方法避開同女同事有任何接觸。所以我走去食飯之前，就喺辦公室in box裏面，求求其其攞咗本印刷刊物去睇。
點 知，原來係民建聯嘅政策建議書，而建議書嘅標題就係「香港國際金融中心發展策略」。我一睇到「民建聯」同「發展策略」呢7隻字都有少少驚訝，因為我第一個 反應係民建聯除咗盡量博攞「油水位」同搞蛇宴、荔枝團之外，原來都會有政策建議。咁我就一路行一路睇，亦開始發覺有一種似曾相識嘅感覺。
雖然我可以肯定從未見過呢啲提議，不過嗰種語氣，嗰種真誠為香港嘅愛，嗰種只要政府「做少少嘢」就可以令到香港欣欣向榮嘅期望，我記得曾經感受過。就喺搭電梯上飯堂嘅幾十秒，我諗真啲，發覺原來嗰種語氣，嗰種真誠為香港嘅愛，對上一次感受得到，就係喺1996年尾，孫柏文有機會睇當時仲係特首候選人嘅董建華嘅政綱時。其實，我哋特區都算好彩，只有公民黨希望有一日可以執政，因為如果民建聯可以落實佢哋希望政府，好似一個十幾歲年輕人燒嘢食時，用叉亂篤個火，咁微觀亂篤金融業嘅建議，我哋就死硬。
兩百個月糧民建聯嫌少
咁係乜令孫柏文鼻 孔噴水？就係民建聯要求政府資助金融業。唔通，民建聯要求政府資助高盛？原來出兩百個月糧對民建聯嚟講都係嫌少。其實，民建聯今次講改革金融業務，都係希 望爭股民嘅票。如果係咁，不如諗方法對付民怨最高嘅認股證，例如溢價太高，「正股郁，輪唔郁」等等嘅毛病。當然，問題始終落喺港交所壟斷，因為冇競爭，唔 憂冇生意，所以港交所中高層嘅第一考慮唔係股民，或者想來集資嘅公司。佢哋嘅第一考慮係唔孭鑊，只要冇新嘢，就毋須孭鑊。所以如果民建聯想解決認股證啲毛 病，就不如「強烈要求」打破港交所嘅壟斷，如果外國交易所想喺香港成立新嘅交易所，民建聯全力支持，之後可以話「成功爭取」。不過民建聯絕對冇強烈爭取打 破港交所壟斷嘅膽量，為香港金融業成功發展前途嘅真誠。
No comments:
Post a Comment