重申一注獨贏買白銀

噚日，孫柏文講 過上個禮拜原材料大跌嘅理由，係因為就算債市、石油及銅價，都紛紛發出花旗國將會因樓市爆煲以致經濟衰退嘅訊號時，聯儲局仲喺佢哋12月開會嘅會議紀錄裏 面話「好擔心通脹壓力」。令市場覺得，聯儲局會有一排先至開始減息。最大問題係，從觀察舊年年尾嘅債市息率，市場已經預期今年會減四次息，不過，聯儲局一 公布佢哋嘅會議紀錄，形勢就冇咁清晰。

不過，噚日 我亦講過全球最大債券基金Pimco嘅基金經理Bill Gross，對於呢份會議紀錄「一於好少理」。因為覺得聯儲局要執拾樓市泡沫爆煲呢個爛攤子，所以繼續預測今年會減息四次，到4.25%。我亦講過好同意 呢個觀點，所以我亦預測黃金白銀下半年一定會好勁，因為聯儲局又一次重開印刷機，瘋狂印銀紙，令紙幣繼續貶值。

而睇番眾多原材料之中，上個禮拜跌得最「甘」就一定係白銀，3日之內跌7%，到12.10美元一盎斯。冇辦法，聯儲局嘅一份會議紀錄，令「紙幣狂魔」忽然多咗好多盟友，出招打壓白銀。

不過，一打就令到白銀價重返佢嘅200日平均線，而我已經多次講過，每一次銀價重返200日平均線都係一次入市嘅好時機。

我由舊年3月6日第一次叫大家「一注獨贏買白銀」開始，就已經話過「白銀每一次升，我都會出嚟邀功，每一次跌，我都會叫你『趁低吸納』。」今日，我就係叫大家趁低吸納！所以今日我用番以前做股票分析員時候嘅術語：「重申目標價」。

（重 申）建議買入：白銀目標價：每盎斯120美元年期：至到2016年3月6日今次，已經係第三次我「重申一注獨贏買白銀」，以下有個銀價圖同我對上兩次「重 申」嘅記錄，相信大家睇完就會知點做。不過，因為黃金白銀成日都有人整古做怪，所以我要再三向大家勸喻，大家不要貪圖方便而買「紙上」白銀，要買就買實 貨，千祈千祈唔好做孖展。

最後，噚日小弟拜讀黃國英兄嘅《英之見》專欄，題為「一注獨贏輸多贏少」嘅文章，小弟獲益良多。文章提及「一注獨贏泡湯機會高達 七成以上」，小弟會永遠記在心中，亦向天發誓希望令大家fan屎做到剩落嚟嗰三成唔泡湯嘅人。