不雅、叛國、公平競爭

好多人曾經問我：「孫柏文，你成日都話自己好支持自由市場，不過點解你咁反對公平競爭法？為咗邊個咁反對？」首先，大家千祈、千祈唔好叫呢條法例做「公平競爭法」，因為如果持平而論，呢條法例其實係「計劃競爭法」。特別係啲好乖、好留意新聞時事嘅學生哥，千祈唔好咁叫，因為你哋每一次開口叫呢條法例做「公平競爭法」，就等如你哋已經中咗政府消委會宣傳嘅毒。

雖然已經有好多人曾經以多種理由反對呢條法例，孫柏文反對嘅原因，係呢條法例會畀啲好心官員太大權力去做壞事。首先，消委會話喺「計劃競爭法」之下，賣嘢定乜價都可能觸犯法例，又同一時間可能完全合法。

加價可能犯法又可能合法（市價升，你加價，會被告「合謀定價」）。

減價可能犯法又可能合法（市價跌，你減價，會被告「掠奪性競爭」）。

維持價格不變可能犯法又可能合法（會被告「操縱價格」）。

好心人上台一樣亂

正當所有行動都可以係犯法或合法，有權去決定是否合法嘅人，會有好大嘅權力。情況有如要界定播乜嘢係「不雅」，做乜嘢算「叛國」，大家真係想畀任何政府委任嘅人咁大權去界定乜嘢係「公平競爭」？記得，係一個擺明車馬會「親疏有別」嘅政府。

喺法例嘅諮詢裏面，政府話（公民黨同民主黨都支持）會成立一個獨立委員會去調查同審判涉嫌違法嘅公司。大家可能會問：「究竟獨立委員會點解唔好？」答案好簡單，啱啱「溫馨提示」過港台鏗鏘集同無綫播《秋天的童話》嘅廣管局，就係嗰種有審裁權力嘅「獨立委員會」。如果有一日，香港好不幸咁遇到孫柏文做「公平競爭委員會」話事人，我一定有方法令所有曾經喺酒吧拒絕過我啲女人受苦。方法就係搞佢哋返工嘅單位。大家要記得，孫柏文當年讀經濟學嘅專科就係industrial organization、market structure analysis 同antitrust policy，如果我唔可以用呢條法例去煮死任何一間企業，我就乜都得！

大家可能會話：「只要防止好似孫柏文呢啲黐線佬做話事人，咪得囉！」問題就喺度！一個真係可以畀到人信心嘅制度，就係無需要恐怕有單一個「黐線佬」或「好心人」上台，令到香港大亂。民主派日日講嘅三權分立、互相制衡，就係希望想達到有呢個制度。問一問大家，如果當年政府推行「八萬五」政策之前，要得到立法會同各大區議會嘅同意，你話會唔會有機會啲左派人士最仇恨嘅「反對勢力」能夠阻止政策落實？唔通我哋中國未受夠單一個「好心人」做事咩？

為未來創業家反對

其實，我咁反對呢條法例嘅原因，係為咗全香港小朋友嘅未來去反對。就算要用到最後一口氣，我都會反對畀政府咁大權力去擾民。我唔想見到未來嘅主人翁，他朝變成創業家嘅時候，每次做商業決定嘅第一個考慮唔係點樣令顧客同消費者更加開心，而係（有錢請嘅話）打電話畀律師問「可唔以可做？」最後，我想向消委會陳黃穗講，我知道你係一個好人，不過呢條法例is a bad law。如果通過嘅話，我可以保證，100年之後，一定仲會有人話你係白癡，因為你全力推銷過。你真係想咁？

消委會總幹事陳黃穗

"快D通過「計劃競爭法」，就算出賣未來棟樑日後服務消費者嘅機會，只要我夜晚得覺，就一於好少理!!!" 設計對白