Wednesday, February 21, 2007

今年大家豬籠入水

首先同大家拜年,孫柏文祝大家豬籠入水、身體健康、青春常駐、世界和平。小弟屬蛇,聽聞財運麻麻,所以如果要為大家提供一個豬年預測,我諗白銀今年都應該上唔到我為大家提供嘅120美元一盎斯目標價。雖然係咁,不過今日都係想同大家講黃金白銀。

阿根廷都有例子

大 家都知道,自從七十年代,世界經過高通脹之後,好多國家都覺得,為咗保護貨幣嘅購買力打壓通脹,可以控制貨幣供應嘅中央銀行,就一定要獨立於政客運作。不 過,世界各地嘅中央銀行加唔加息去控制貨幣供應,就好視乎行政部門計算出嚟嘅「通脹率」。甚至乎可以話,量度通脹率嘅人,雖然係政府行政部門,不過可以牽 住「獨立運作」嘅中央銀行走。

早排,日本央行宣布唔加息,就係一個咁樣嘅例子。本來,如果日本政府用原有嘅計算方法計通脹率,日本通脹率應該有0.9%, 而日本央行話,通脹率超過0.5%就要加息,咁上次日本中央銀行就好應該按照自己嘅話,加息。不過,上次因為自民黨搞嘢,改變通脹率計算方法,結果出嚟嘅 由原先嘅0.9%,變咗做啱啱唔過加息規定嘅0.4%,所以最後大家都見到日本央行冇加息,繼續印銀紙機長開,濫發鈔票。

咁當然濫發鈔票係冇專利權,啱啱 喺地球嘅另一邊阿根廷,負責統計通脹嘅官員,因為唔肯屈服改變通脹率嘅計法,所以俾總統炒咗。根據《華爾街日報》報道,最後改由一個由武警護送嘅人入去 做。大家可能會問:「咁結果係點?」結果就係市場預期通脹率係1.5%至2%,不過官方統計出嘅結果就係1.1%,低過預期,你信唔信?

對抗通脹只得一招

債 券市場嘅眼睛係最雪亮嘅,官方數字一出,阿根廷債券息率即時飛升。無他嘅,通脹率高都只不過等如中央銀行「好廢」,不過如果通脹率係篤數出來嘅,就等如政 府「好奸」。「奸」比「廢」嚴重得多,所以債券市場要求嘅值博回報就高咗。

講咗咁耐,大家可能又會問:「咁即係點?」呢幾日,日本中央銀行又會再次召開議 息會議,討論吓加唔加息,市場今次預期有六成機會會加息。之但係,e家全球濫發鈔票問題咁嚴重,做通脹數做成咁,出晒陰招,真係可以唔加!大家可能會再問 多次:「咁即係點?」咁即係又到白銀戰隊隊長孫柏文出場嘅時候,喺呢個濫發鈔票嘅年代,惟有買實貨黃金白銀先至可以對抗通脹,保住自己嘅購買力,記住,唔加息,又係白銀戰上場嘅時候喇!

5 comments:

  1. 金膠手指,聽張五常講,好多野都可以做貨幣既「錨」,唔單只貴金屬喎!

    ReplyDelete
  2. 前打金膠仔... hahahahaha

    Yes... I agree! A lot of things can be the anchor to currencies.

    In fact, I think Ko Ming Fai will be writing about that for the gold finger column Friday. check it out.

    As for 70/F... No... My beard is not that voluminous. And plz, not a single shred of white... yet.

    So... does your pic look like you? and do you move your head as if you are watching a tennis match sitting at the net? hehe

    Shuen

    ReplyDelete
  3. 哈囉
    我貼左個頭出黎
    你話似唔似丫

    ReplyDelete