Wednesday, February 21, 2007

好懷念胡國興法官!

過年之前幾日,我哋尊貴嘅特首曾蔭權挾住八成嘅選委支持票,即係641 票,向選舉辦事處報名參選特首。其實,參選特首選舉只係需要100個選委提名支持就可以報名參加,但點解我哋嘅曾候選人要搵咁多票呢?我諗梗係為咗個 「勢」喇!特首一定係想話畀另一個特首候選人梁家傑聽:「我有幾多人支持我吖,淨係呢個『勢』已經『食硬』你喇,梁生你點同我『揮』吖!選舉如打仗,冇個 『勢』又點打贏特首選舉呢場仗!」

彭鍵基法官應該發威

不過,正所謂「同人唔同命,同遮唔同柄」,孫柏文記 得當年參加2000年立法會選舉,出戰港島區。嗰次我大包尾,亦要承認選民眼睛係雪亮嘅,不過今日唔係講我,而係回想我當年嘅對手,都係姓曾名健成嘅「阿 牛」。「阿牛」喺2000年報名時,提交近萬個選民提名名單,諗住嚟一個「萬人挺曾」嘅氣勢去參選。

點知卻惹來我哋公正嚴明嘅選舉委員會主席胡國興法官好 唔滿意,不點名批評「打窒」。胡官話佢浪費選舉事務處嘅人力物力,花大量時間去核實提名人士資格,可憐嘅「阿牛」就因此被冠以「浪費公帑」嘅惡名,成個 「氣勢」就咁俾胡官打謝咗。雖然唔知道有冇關係,結果「阿牛」嗰屆參選立法會輸咗。

以前,特首董建華攞700幾個選委提名,都係迫不得已之下想將不記名投 票變成可以秋後算賬、白色恐怖嘅記名投票制度。今次,擺到明有人會同曾特首參加不記名投票環節,攞咁多個提名為乜?到時候如果得票率比起提名數目少,曾特 首就會好樣衰。

所以特首選管會主席彭鍵基法官應該喺上個禮拜,為下屬挺身出聲,同曾候選人講:「你係咪玩嘢吖!臨放年假先至『泵』600幾個提名名單嚟, 交100個做吓樣咪算囉!叫我班『o靚』放假都放得唔安樂,做餐死嘅去核實,你拍拍『籮柚』影吓相就走得啫,浪費公帑!」講咗仲可以凸顯彭法官嘅獨立性, 何樂而不為?

No comments:

Post a Comment