HSBC = Hey Sucker Banking Corporation？

滙豐銀行喺上個禮拜四出嘅盈利警告，令全世界嘅財經口水佬，都喺周末紛紛討論呢單嘢。孫柏文喺上個禮拜五都話過，滙豐出警告係因為花旗國業務出事，因為滙豐美國業務專攻低下階層，樓市升時，佢哋就算收入唔夠畀供款，都可以做二按攞錢還，所以就製造咗歌舞昇平嘅假象，而市一跌就出現壞賬。

喺我哋特區裏面嘅財經口水佬，好多都話繼續對滙豐有信心，最多都係話要等到3月滙豐出業績嘅時候，知道滙豐要對呆壞賬做幾多撥備，跟住就可以入市買滙豐。

不過，外國嘅財經口水佬就冇咁友善，而最唔客氣嘅口水佬，就肯定係嗰啲同我一樣，睇淡花旗國樓市嘅花旗國財經口水佬。如果要我分析佢哋評論滙豐嘅語氣，我諗最接近嘅繙譯就係「滙豐硬膠！」孫柏文作為一個「飲香港水、流香港血」嘅特區人，喺呢個周末睇到呢啲咁嘅評論，心確實有啲酸。理由係滙豐嘅英文名HSBC嘅H始終都係Hong Kong。

不 過，班花旗國口水佬最唔客氣嘅地方，就係連HSBC呢四個英文字母都攞出來玩，話舉行「誰人能夠最抵死演繹HSBC呢四個英文字母？」比賽。搞手係一位作 者，佢喺自己嗰篇分析滙豐嘅文章題目，話HSBC等如Hey Sucker Banking Corporation（羊牯你好銀行）。

撥備越多越好

見 到心雖然酸，不過，滙豐都真係要檢討吓自己。首先，冇理由放債出去畀啲唔應該置業嘅人去買啲唔值嘅樓 Helped Stupids Buy Crap。呢班人好多都係希望可以用更加高嘅價錢賣番層樓出去Hoping Somebody's a Bigger Chump。

現在，樓市開始下跌，仲要唔係軟着陸 Housing Stabilization Becomes Crash，令滙豐要收番啲樓Homes Shall Be Confiscated，不過可能資不抵債 Holding Shitloads of Bad Collateral。當然，孫柏文比起呢啲口水佬樂觀得多，因為滙豐管理層對 樓房市場大跌身經百戰，淨係喺特區「八萬五」之下都經驗豐富 Have Seen Buildings Collapse。

不過，溫馨提示滙豐，3月出業績嘅時候要一次過為花旗國業務做撥備，越保守越好（即係撥備越多越好），最好就係連最睇淡美樓市嘅人（好 似我呢類人）都覺得撥備撥得太誇張，咁因為市場覺得冇需要再擔心美樓市，滙豐股價就會到谷底，可以開始上升。不過如果喺3月之後，滙豐又要再出嚟為花旗國 業務出集團盈利警告，咁滙豐股價都會好難翻生，到時候做股東就會好慘Hapless Shareholders Burnt Completely！