Monday, March 05, 2007

滙豐今應盡驅魔

今日,滙豐(005)就會公布業績,相信又會再次賺好多個億。不過滙豐喺06年幾好賺都好,孫柏文相信市場今日最終嘅焦點,都會放喺滙豐對未來業務情況嘅預測,特別係佢哋喺花旗國嘅業務。即係現稱為HSBC Finance,03年收購嘅 Household International(HI)。

相 信冇人可以反對,經過上次「處女盈利警告」之後,滙豐今時今日嘅花旗國業務,已開始變成市場認為係個「流血不止嘅傷口」。如果要打個比喻,市場將會覺得滙 豐同 HSBC Finance嘅關係,有如(13)和黃同3G嘅關係。呢種「公司傷口」流嘅不單止係公司嘅錢咁簡單,乜嘢公司都會輸錢,最重要係,究竟「輸錢」係唔係反 映一啲更深層次嘅公司文化、管理問題。

滙豐喺短短 嘅四年前,即03年,買專做放債畀啲「還款能力低債仔」subprime lending生意嘅花旗國HI,到04、05年大量放債畀「還款能力低」嘅花旗國人買樓。當時,已經有好多外國嘅財經口水佬警告,話呢班「還款能力低」 嘅人,還款能力好似好強嘅理由,係因為有一個節節上升嘅樓市,令呢班債仔可以將自己間屋變成提款機去還錢。只要樓市升到頂,開始逆轉,呢班「還款能力低」 嘅人就會開始走數。借錢畀佢哋嘅單位,就自自然然會出現好多壞帳。

當然,滙豐呢幾年來都冇聽呢啲忠告做事,可能因為滙豐覺得以上嘅分析係錯。不過,現在公司花旗國業務開始出事,市場絕對可以好持平咁問滙豐:「歸根究柢,係唔係買錯HI?係唔係根本唔應該喺花旗國面對40年以來,最低嘅1%利息,去買一壇『樓市逆轉就大鑊』嘅生意?」

「魔鬼」已經上身

一 間公司管理層做咗錯嘅決定時,最極端嘅解決方法,就係更換管理層。大家可能會問:「滙豐唔係啱啱換咗花旗國業務嘅總裁咩?」係就係換咗,不過被炒嘅人係 HI啲舊將,問題根本唔係邊個人可以避免HI車毀人亡,問題係邊個人叫股東上呢部車先?當時拍板要買HI嘅滙豐管理層,除咗走咗去Vodafone嘅 John Bond前主席之外,其他嘅人都仲喺度。一路以來,好多香港人深信不疑「長線買滙豐必勝」,而且亦因為呢個信念豐衣足食。其實點解「長線買滙豐必勝」?背 後真正原因係滙豐嘅管理班底,可以不斷喺公司發掘、製造有實力嘅新領導班子──「滙豐人」。

而滙豐股價除咗賬面值之外有嘅溢價,某程度上都係反映「滙豐 人」存在嘅價值。如果市場開始發覺,「滙豐人」機制出現問題,冇辦法再信呢個系統,不過又因滙豐股權分散,根本冇可能從投票方法取替「滙豐人」。唯一方法 「投不信任票」,就係將股票賣出,到時公司同股價都會幾有問題。

最後,滙豐已被HSBC Finance呢隻「魔鬼」上身,今日,管理層要面對投資者,希望佢哋把握呢個機會,大大力幫公司驅魔!股價一次過見底,好過慢慢出現「不信任」危機。

No comments:

Post a Comment