Monday, June 11, 2007

Web 2.0大引爆

恭喜,恭喜!孫柏文今日想首先恭喜隔籬《案內人隨筆》尹思哲兄嘅新書出版!書名叫 做《Web 2.0大引爆》,題材當然圍繞Web 2.0。咁思哲兄基本上將Web 2.0界定為user generated content,即係話如果你嘅網站想追隨Web 2.0模式去運作,你網站上面提供畀用戶嘅內容,都要係由用戶群提供,互相分享。

例如壹傳媒嘅網站,不論文字、相片、短片等等,都由公司提供,所以係百分 百Web 1.0。而壹網站唯一係Web 2.0嘅部份,就係文章嘅尾部,有個叫「我的意見」嘅討論區畀讀者留言。《金手指》嘅「我的意見」討論區,就有啲好似「我唔明一個EQ咁低嘅所謂金手指點 解仲可以響度日日寫嘢……」之類嘅留言。呢啲留言唔係寫畀我睇,係寫畀其他讀者、用戶睇。

Web 2.0靠用戶群提供內容,亦即係話冇其他用戶,個網站就會冇用。例如,壹網站得一個用戶,只要肯燒錢,壹傳媒都可以提供大家日日見到嘅新聞內容。又例如 Amazon.com得一個用戶,只要股東肯燒錢,個網站都可以維持龐大嘅選擇。不過,大家試諗諗如果eBay或AdultFriendFinder得一 個用戶,嗰個用戶又可以同邊個進行買賣同交流呢?(係,eBay同AdultFriendFinder先至係Web 2.0始祖)

賣家玩嘢買家唱衰

不 過,有如思哲兄喺新書話齋,玩Web 2.0唔係新與舊、老與幼嘅分別,而係心態上嘅區別。擺個網站出嚟畀用戶分享文字、相片、短片,不論有幾小眾趣味、露骨、不雅等等,個網站都要尊重佢哋嘅 活動自由。要刪除,都應該由用戶互相制衡,例如,eBay就有個feedback機制,賣家玩嘢,買家就可以寫衰佢。討論區嘅人離題,就有起題嘅用戶板主 刪除。就連YouTube都畀用戶將短片flag做inappropriate。

做唔到咁樣嘅權力下放,例如搞個討論區吓吓驚有人會留粗口,就好難成功, 不如唔搞算數。好多人認為YouTube已經係Web 2.0嘅表表者,不過今日孫柏文想 為大家篤個比YouTube更Web 2.0、更權力下放嘅例子。噚日,我哋姊妹報《台灣蘋果日報》,用咗「台灣版YouTube 『很快會有』」做頭條,即係話好快就有繁體中文版,係指好快就會由YouTube公司提供一個繁體中文版。

其實,我哋特區有個網站叫做 anobii.com,網站係為咗畀用戶有機會分享自己「書櫃有乜嘢書」,畀用戶互相比較。創辦人就係以前寫《蘋果批》嘅宋漢生,佢開呢個網站,都係想拋 磚引玉咁知道其他人睇過啲乜嘢書,同埋佢哋覺得好唔好睇。不過,宋漢生係個「三文兩語」嘅書蟲,所以一開始已經想令個網站有多個語言版本。

意大利版48小時面世

宋 漢生嘅解決方法,就係將繙譯網站嘅工作交畀用戶,anobii將需要繙譯嘅詞彙,整喺個目錄表上面,用戶跟住就可以喺啲詞彙隔籬,一個一個寫上其他語言嘅 繙譯。只要有95%嘅詞彙被用戶用某語言繙譯,anobii就會啓動嗰個語言嘅版本。Anobii現在有九種不同語言版本,除咗中英文之外,其他都係由用 戶繙譯。

我問過宋漢生:「你都唔知佢哋繙譯得啱唔啱,因為你都唔明佢哋寫乜,點搞?」佢話:「如果真係譯錯,啲用戶會自己改。」佢仲話,唔知點解突然間有 好多意大利用戶,每日都有二百個新用戶。結果,從第一個詞彙被繙譯成意大利文到可以啓動意大利文版嘅anobii,只係用咗48小時。

各位,你想搞Web 2.0之前,就問吓自己,有冇宋漢生將權力咁樣下放嘅勇氣?

講相信用戶、權力下放,就連花旗國嘅陳士駿都不及香港嘅宋漢生。

3 comments:

  1. Dear Golden Finger,

    I could not sell 606 today. What should I do ? Just hold it ?

    ReplyDelete
  2. I wouldn't have bought it in the first place, esp if you are betting on ethanol.

    Ethanol is such a sucker's bet. Turning corn into fuel is something China cannot do because of continued malnutrition. Only works in the US because of MASSIVE subsidy from the US govt to the farmers.

    Anyway, now that you have bought it. All I can say is good luck. Very tough choices you have to make.

    ReplyDelete
  3. 等唔到聽日喇
    喂睇到你今日果篇關於模擬炒股冠軍既文呢
    好爽囉

    ReplyDelete