Saturday, November 10, 2007

12月初減息?

前晚,孫柏文放工返屋企開電視睇。因為我每日放工嘅時間比較晏,返到屋企時多數已經過咗凌晨十二點。小弟一向以來,都非常鍾意睇啲有濃厚戲劇性嘅娛樂節目,所以喺嗰個時段,一定係睇財經台CNBC直播花旗國股市最新情況。

其實,好多人批評CNBC只係一間「啦啦隊」財經台,而唔係中立報道、分析財經資訊。情況有如「天氣台」,裏面啲主播,對住啲觀眾希望日日晴天,落雨就會邀請啲會話「雨好快過!好快又會天晴!」嘅嘉賓。

雖然,我對於呢個論調基本上同意,不過我覺得,有兩個會喺CNBC發言嘅人,值得大家睇吓。第一個就係叫 Arthur Cashin,佢喺股市已經打滾好多年,捕捉市場情緒嘅能力非常高。

第二個就係跑債市新聞嘅 Rick Santelli,好多時債券價格走勢反映一啲對股市不利嘅預測時,就算當時股市背道而馳,Rick Santelli就算被千夫所指,都會照直解讀債市走勢。不過,就算CNBC偏向「喜歡」牛市,佢哋對於市場升跌原因嘅掌握都尚算不錯。所以,前晚我對 CNBC都幾失望。大家都應該記得,前晚花旗國股市跌咗360點,特區股市亦承接跌勢,喺噚日跌948點。

金融業瞓低

咁我前晚一路睇CNBC,佢哋完全冇能力解釋,點解股市沽壓咁大。開市就話係油價升,點知油價開始跌,股市繼續沽。之後就話係美元弱勢,點知美滙指數又開始轉強,股市照樣跌。

其實,花旗國同我哋特區一模一樣,已經變咗「政策市」。我哋啲金融從業員北望溫家寶,佢哋啲就仰望伯南克。點解我會話佢哋係「仰」望?因為佢哋嘅金融業已經瞓低咗。

講真,前晚跌360點嘅原因,係因為聯儲局開始以更高姿態方式,希望市場「知道」12月初會議減息唔係必然。孫柏文呢啲死硬派,當然覺得聯儲局一定減息去摧毀美元。至於飄忽無定嘅市場,呢排都好似我咁,覺得減息係必然。

不過,前晚跌嘅360點,就好似有市場參與者,覺得聯儲局會更加大聲,希望市場信吓佢「可能唔減息」。呢幾日,伯南克一定會做做show,講講嘢。不過,市場就算聽到,到最後都會當聽唔到,迫聯儲局喺12月初減息。


No comments:

Post a Comment