Thursday, March 27, 2008

欠薪基金製造更多欠薪

噚日,差佬又拉人。今次拉嘅人,就係一個拖欠員工薪金嘅老闆。睇電視新聞報道,就話呢個開酒樓嘅老闆,涉嫌經常無端端將酒樓執笠,幾日之後,就會用唔同嘅名,開番間酒樓,重新營業。

而每一次酒樓「結業」,個老闆必定會拖欠員工薪金。不過可能因為個老闆精神分裂,仲以為自己係社工或區議員,所以見到被拖欠薪金嘅員工,就「輔導」佢哋,教佢哋問政府攞番啲欠薪。

幫政府打工?


大家可能會問:「啲員工又唔係幫政府打工,又唔係政府欠佢哋薪水,點解問政府攞?」

原來,政府搞咗個叫做「破產欠薪保障基金」。原意就係一旦有公司倒閉,有員工被拖欠薪金,呢個基金就會根據條款賠畀啲員工。

噚日睇電視,就發覺一個怪現象。電視台完全搵唔到員工訪問,佢哋唔肯出鏡。拖欠薪金喎!點都要出吓聲!大家可能會話佢哋驚炒魷魚,所以先至唔出聲,呢個結論我都同意。不過又為大家提供一條思考題。

你係以上嗰個老闆,你擺到明唔會出糧,如果要請人,基本上佢哋薪金要幾多,根本冇所謂。現在換轉你係一個員工,你知道有「破產欠薪保障基金」,基本上一定有糧出,你最想幫邊個打工?咪就係唔會同你抝數個老闆囉,即係嗰啲擺到明唔會出糧嘅老闆!

「破產欠薪保障基金」最諷刺嘅地方,就係令擺明唔出糧嘅老闆,成為打工仔最受歡迎嘅老闆。所以噚日電視台咪搵唔到員工訪問囉!

嗰段新聞,最後搵個飲食業界工人代表嚟訪問。佢話現在只係罰錢,對老闆唔夠阻嚇作用。唔通要坐監、打靶?我永遠覺得,對一個老闆最有阻嚇作用嘅後果,就係請唔到人幫佢打工。不過一日仲有「破產欠薪保障基金」,啲老闆就唔會面對呢個後果。

2 comments:

  1. 1."「破產欠薪保障基金」最諷刺嘅地方,就係令擺明唔出糧嘅老闆,成為打工仔最受歡迎嘅老闆。"
    明知道老闆不會出糧,而又真的肯為其工作的人,根本就是存心要拿破欠基金,那不正是"串謀詐騙"嗎?

    2."對一個老闆最有阻嚇作用嘅後果,就係請唔到人幫佢打工。不過一日仲有「破產欠薪保障基金」,啲老闆就唔會面對呢個後果。"
    沒有破欠基金的話,老闆真的會面對這個後果嗎?
    "無端端將酒樓執笠,幾日之後,就會用唔同嘅名,開番間酒樓,重新營業。"名字都不同了,有誰會知道那個老闆原來曾經欠薪?結果改了名以後,一樣有人會為這個老闆打工.但是那些被欠薪的人,如果沒有破欠,便要打幾年官司追番欠薪,仲要未必追得番.就算有法援,他們即時沒有收入,生活問題怎麼辦?

    3.還有,破欠基金賠償給員工以後,是會向雇主(清盤人)追番筆錢的,只要讓破欠基金優先申索清盤所得的資產,破欠基金的損失就可以減低.至於那些存心詐騙的人,除了用法律對付他們,我看不到其他方法.

    ReplyDelete
  2. "串謀詐騙"...

    I have never thought of it that way!

    but yes it is quite true!

    As for a bad employer... If the workers are empowered so that if money does not arrive for the first time they could walk away... and not gamble after 3 missed pay days whether money would still come. would be best.

    as for fraud against the fund. The only way out I can see to remove all incentive to cheat is to abolish the fund.

    ReplyDelete