Tuesday, April 08, 2008

點解唔email聖火呢?

任何一樣商品或服務,特別係推出期有時限嘅,主辦單位都會搞啲「造勢活動」。有時限嘅意思,就係例如搞展覽、的士高派對等產品。當然,參與選舉嘅政客候選人,都係「有時限產品」,所以佢哋都好喜歡搞「造勢活動」去宣傳。

傳遞聖火宣傳效果大

不過,如果要孫柏文揀一種項目,最能代表啱啱提過嘅「有時限」特質。我相信一定係體育運動。而體育運動項目當中,最多人睇同感到興奮嘅就一定係世界盃足球大賽。第二先至係奧運會。

多都唔講,對上一次中國各大省市人民自發性走上街慶祝,係為乜?唔係申奧成功囉,而係中國隊02年打入世界盃。世界盃就有buzz,奧運會只得 hype。係咪北京搞,我都係咁話。

不過,奧運始終都係「有時限」嘅產品,開始之後,兩三個禮拜內就會完,所以奧運都搞「造勢活動」。而相信大家都知,近幾屆奧運嘅主辦單位,覺得最有效、最終極嘅造勢活動,就肯定係傳遞聖火。

雖然我唔知點解咁有效,不過啲主辦單位往往講到聖火嚟到時,我哋會興奮到好似耶穌基督再世咁。

其實,大家真心問自己一句。對上咁多次奧運嘅傳遞聖火,你又記得幾多個片段?咪又係傳傳吓,個火熄咗嗰次。

講真,傳遞聖火呢樣嘢,你唔做,你估啲人會唔知奧運即將舉行?

根據我嘅資料搜查,1976年蒙特利爾奧運會,佢哋傳遞聖火嘅方法,就係依靠衞星傳送。用得衞星就當然快過打針,幾秒鐘就由希臘傳到加拿大,所以啲人話冇feel冇造勢。

email聖火安全快捷


不過今時今日,相信祖國政府一定有人諗:「如果可以用番衞星傳遞,就唔使煩!」

當然,今時今日已經唔係430穿梭機、閃電傳真機嘅年代。所以如果祖國要玩科技傳遞,最好就係email個聖火。除非有搞分裂分子做hacker,個聖火應該安全。

最後,大家唔好覺得啲歐洲人針對我哋中國人,係要搞寸我哋個派對。你估如果今次係花旗國搞奧運,會冇人示威咩?

4 comments:

  1. email 聖火....係喎,點解唔攪番個聖火電郵?

    有趣。仲可以[ 電影炸 ] 爆個聖火!

    ReplyDelete
  2. 舊金山聲東擊西,條橋都幾絕

    ReplyDelete
  3. 16th April, Apple Daily

    「伯南克只做一屆?」一文,提到前董特首是國家副主席是錯誤的,正確是全國政協副主席。不知道別亂寫...香港人這方面太無知...

    讀者
    Jerrywangprc@yahoo.com.hk

    ReplyDelete
  4. 16th April, Apple Daily

    「伯南克只做一屆?」一文,提到前董特首是國家副主席是錯誤的,正確是全國政協副主席。不知道別亂寫...香港人這方面太無知...

    讀者
    JerryWangPRC@yahoo.com.hk

    ReplyDelete