Monday, June 30, 2008

買定put輪等睇戲

「我哋預期,美國金融市場會喺幾個禮拜之內,完全崩潰。」以上呢句說話嘅來源,係從荷蘭報章De Financiele Telegraaf,用荷蘭文報道富通銀行主席Maurice Lippens嘅說話。噚日我第一次見到以上句話,係喺一個花旗國網站,用英文寫。因為句說話實在太震撼,孫柏文就搵番個原文,再用好幾個電子繙譯網站繙譯。雖然冇個繙譯係一模一樣,不過「美國金融市場」、「喺幾個禮拜之內」、「完全崩潰」等嘅詞句,就個個繙譯版本都有。

銀行籲做防風措施

睇淡唔係出奇,睇得好淡就連孫柏文都係,因為如果唔係覺得花旗國金融市場會出現崩潰情況,都唔會不斷叫大家一注獨贏買白銀。不過我當年叫買白銀,雖然擺出升12倍嘅目標價,但畀個目標價10 年時間去實現,Lippens主席話嘅係「喺幾個禮拜之內」,如果係真,買白銀做保險,就不如加碼買put輪,入咗貨後等睇戲。

其實,富通銀行要大幅折讓股價去集資,所以個主席要講到咁甘先至可以解釋,點解要大幅折讓同咁急去集資,但唔淨係富通銀行做以上推測,巴克萊、皇家蘇格蘭等,呢啲係咁俾穆廸降低信貸評級嘅銀行,都紛紛建議佢哋啲客戶,要做足十號風球嘅防風措施,因為「幾個月之內會爆鑊」。

美聯儲局招數盡出

雖然有咁多睇得咁淡嘅預測,被醒目仔充斥嘅《金手指》fan屎群,一定有醒目仔諗:「個個都睇淡,仲唔係時候買升?起碼都係時候博反彈。」呢個睇法唔係冇根據,不過今次花旗國股市,已經係從1月(法興)、3月(Bear Stearns),第三次挑戰低位。

1月聯儲局就即刻減息0.75厘。
3月聯儲局就將投資銀行同佢哋嘅負債,都孭上身。

今次,仲有乜嘢招數可以出?

冇嘅話,挑戰第三次先穿嘅支持位,一穿就好大鑊。仲有,成交額完全唔對路,完全唔似可以博反彈嘅支持位。都係嗰句,買定put輪等睇戲。

Sunday, June 29, 2008

A little history for tonight's Euro 08 Final



The Euro 08 final will be held tonight in a few hours time.

A sport that brings people together played at a place that was part of the greatest savagery of mankind.

Saturday, June 28, 2008

投資狀



Its been a while since PetroChina traded at RMB40+...

Anyhow, is this an ad to sell Unicom service? But whatever reason this was made, well made hahaahahha

Friday, June 27, 2008

要媾女就要增值

星期三晚,孫柏文約咗個朋友去蒲,於是佢去我間天台屋度搵埋我一齊出發。佢一入屋就忍唔住話:「乜你成張梳化都係衫?」

我話:「你估我想o架?上個禮拜係咁落雨,星期二有太陽洗衫,返工時話會打風,不過諗住天文台又係放流料。我咪將啲衫掛起晾。點知放工返到屋企,見到個晾衫架瞓低咗,全部衫跌晒落地,仲濕埋,惟有拎晒入屋等好天再洗。」
「啲衫就咁喺度發臭呀?要媾女就要增值。洗乾淨啲衫就係增值。」

聽到個「值」字,作為一個讀過經濟、又好鍾意spin(政治化妝)嘅撰稿員,我即刻話:「增唔增值,只係觀點與角度。」
「洗衫都唔係增值?唔通係減值咩?咪玩啦孫柏文?」
「咁你記唔記得上次你去日本前講乜呀?你話想買自動販賣機賣嘅日本女生底褲……」
「上次話到明係飲大咗,仲講?」
「酒後吐真言。不過咁,如果yi家有兩條日本女人着過嘅底褲,一條係未洗,一條係洗乾淨,你會用高啲價錢買邊條吖?咁你話洗衫係增值定係減值?」
「超,你個例子咁極端。」

衡量價值觀點與角度

「極端?係kinky啫!畀個冇咁 kinky嘅例子你。之前喺花旗國,有個工程師同學榮升老竇之列,個BB三月個大就轉飲奶粉。有一晚,夠鐘餵BB飲奶,佢奉老婆之命去開奶,做足老婆教嘅程序,但點知個仔係都唔肯飲,惟有嗌醒老婆問點搞。佢老婆一聽,就吩咐老公喺洗衣籃度,攞番佢件着過仲未洗嘅睡衣,鋪喺自己身上先餵BB。我個同學雖然唔係好明,不過哺乳嘅嘢都係乖乖哋聽女人話照做。佢鋪咗老婆件睡衣喺心口先餵奶,估唔到佢個仔真係good good聲飲晒支奶大覺瞓。我個同學覺得好神奇,本着佢嘅科學家精神,推醒佢老婆問個究竟。佢老婆睡眼惺忪咁話:『因為件睡衣有我陣除,BB仲以為係我餵緊佢呀儍佬。』咁,你話喺呢個情況下,洗衫係增值定減值嘞。」

我講完之後,朋友就有啲唔忿氣,所以我就同佢話:「講媾女增值,係要好似尹光首歌《少理阿爸》入面嘅歌詞──要自我增值,take嘢加強性能力。」

我朋友聽到,就即刻企起身跳舞rap出嚟,而我亦都加入。就係咁,兩個人一路rap住歌詞着鞋落樓……

Wednesday, June 25, 2008

中海油嘅油 香港已用晒

早幾日,喺沙地阿拉伯舉行嘅巨型石油大派對,卒之曲終人散。除咗燃燒好多飛機油之外,唯一「成果」就係沙地政府應承增加石油產量。加幾多?喺呢個每日用8600萬桶石油嘅世界,增加20萬桶。大家可以自己去計算個百分比。

以前孫柏文做石油股分析員時,曾經撰寫過一個研究報告,就係講喺世界上,特別喺啲OPEC油組國家裏面,究竟有幾多剩餘未使用嘅可生產量。幾年前要研究嘅原因,就係如果油價由當時40美元一桶,直線飆升。美帝政府為首嘅西方世界發爛,用盡卑劣手法去迫使油組國家增產,究竟即時可以增加幾多供應。

油國生產量已近頂

其實呢幾年嚟,油組每次話「會增產」,增加嘅只係油組畀每個成員國嘅生產配額。不過事實上,每個油組成員喺幾年前,已經冇理個配額。個個都有幾多可生產量,就生產幾多石油。除咗一個國家之外,完全冇剩餘可生產量。呢個國家就係沙地,所以如果任何一個非沙地嘅油組成員話「會增產」,基本上佢哋係喺到膠嗡。

當時沙地嘅可生產量係每日1000萬桶石油,用咗90%。跟住增產到950萬桶石油,而石油大派對之後,就話會增產到每日970萬桶。剩番30萬桶士啤。雖然,沙地政府話去到出年年尾,佢哋能將可生產量推到每日1250萬桶石油。我絕對相信德州專做能源項目生意嘅投資銀行Simmons & Company,一路以來嘅講法,沙地政府話「會增產」又係膠嗡。

增需求不如減消耗

講真,當地球上60億人,每日要搵方法去分配 8600萬桶石油,你覺得現價高都只不過係以前太平。再講,特區人民平均每人耗油量,係大陸13億同胞嘅8倍。我哋特區耗油量,就係大約每日30幾萬桶。 30幾萬桶即係幾多?中海油(883)嘅生產量,都係30幾萬桶一日。一個700萬人香港已經用晒中海油嘅產量,13億人又會點?

老土都要講句,想增加供應,減低需求消耗,「價太高問題」嘅最好解決方法,就係供應商落袋同消費者自己出錢面對嘅價格持續「太高」。特區減油稅,真係得孫柏文反對?

What the speculators are doing with the USD

Ok.

When speculators (non commercial bank traders) take a certain position, especially when it gets to the extremes (either long or short), it could serve as a useful contrarian indicator. Here is a series of charts for your perusal. All charts current as of Monday 23rd of June 08.

Anyhow, this first chart is the TOTAL net positions speculators have against the USD in all currencies. As you can see, speculators are now net long the USD.



-------------------

This second chart is the breakdown of what the speculators are long and short. They are very long on the AUD And Mexican Peso (MXN). While short on the GBP.



-------------------


This third chart is the net position in the "carry trade". As you can see, it has pretty much been unwound since '07.



-------------------


Finally. The net positions for silver. Not too long, not too short. No flashing buying indicator.

Monday, June 23, 2008

《亞洲華爾街日報》的末路

千禧年嘅一個下午,孫柏文喺花旗國就讀大學嘅宿舍,同一名同學hang out吹水。傾傾吓傾到當年嘅花旗國總統選舉,該名同學突然提到當日嘅《華爾街日報》,有篇文鬧戈爾鬧得好抵死。佢一講,我就記得我未喺信箱攞當日我訂閱嘅《華爾街日報》。所以我就起身諗住落樓攞。

網上新聞更快更多

點知一起身,個朋友就問:「你去邊?」我答:「攞報紙。」佢再問:「有冇搞錯?仲未訂wsj.com咩?」

講真,當年花旗國啲寬頻,仲係好慢。99年試過上 wsj.com,不過因為慢到嘔,所以都係睇報紙版。不過,千禧年嘅嗰個下午,同學走去我嘅電腦開wsj.com,click兩吓就搵到鬧戈爾篇文。跟住同學仲推介一篇講盈科數碼動力嘅文,叫我睇埋。我話嗰晚先睇。之後同學走時,登出wsj.com,我送客兼攞報紙。

點知打開份報紙,冇講盈科篇文。原來,篇文係《亞洲華爾街日報》嘅報紙版先至有,北美報紙版就冇。嗰晚我就訂閱wsj.com,一訂就訂到8年後嘅今日。亦喺嗰日之後,再冇試過出錢買報紙版《華爾街日報》,返到特區都係咁。

其實喺特區,我呢代啱啱30歲或更後生嘅人,已經冇人睇報紙版《亞洲華爾街日報》。就算以前喺股票行,雖然有份報紙版,不過冇同事睇,個個睇網上版。因為惡性循環,越少人買報紙版,報紙版嘅料就越少,令更少人買。所以,報紙版《亞洲華爾街日報》將快上末路。

紙價升報業大難題


不過冇報紙版,唔等於《華爾街日報》喺亞洲玩完,因為wsj.com已經做到報紙有嘅網上有晒,報紙冇嘅網上有埋。今時今日wsj.com喺網上版爆新聞,股價照郁。鬧嘅亞洲政府政策,一樣有咁多人和應。

其實,國際報業現在面對嘅第一個大難題,肯定係紙價。紙價已倍計咁升,一個傳媒機構,真係要將紙用得淋漓盡致,冇收視就要cut。不過,風險就係踏上《亞洲華爾街日報》惡性循環之路。唯一辦法就係搞好個網。不過如果網只係搬報紙嘅嘢上去,紙一cut,連網都綑綁式進入惡性循環。

報業、傳媒真係進入一個非常艱難嘅時期。最後因為版面調動,《金手指》將會從現在開始,喺星期一、三、五同大家見面。

Sunday, June 22, 2008

司長夠草根!!



Secretary Tang reminds me of the G. W. Bush prior to 11th September 2001.

Friday, June 20, 2008

陳慧琳同財經節目

禮拜二晚,孫柏文同個博學多才、冰雪聰明嘅朋友傾電話。對話中,有機會分享我喺《蘋果日報》返工要思考嘅問題。特別係吸取喺報紙撰文、電視做節目、網上寫blog等提供內容嘅經驗。我喺每個交易日4:30pm,《蘋果日報》財經節目《你貼股 我教路》裏面,作為content provider,如何提高觀眾即場參與同interaction。

我個朋友都喺傳媒工作,但係工作範疇係單向傳媒,除咗收觀眾啲來信,絕對冇 interaction。唔知佢係咪俾我悶親,想轉話題,突然間話:「唔好講咁多,聽晚我帶你去實地考察,睇吓content provider同觀眾interaction嘅case study。我今晚講,你都唔會明。你要自己去睇先至知。」
我第一個反應:「係咪咁勁呀?我去過電視台、網上電台做嘉賓,又主持網上節目,你呢個單向傳媒人,究竟識唔識o架?」

禮拜三晚,我揸車接嗰個朋友,問佢去邊,佢答:「紅磡火車站。」我再問:「唔係要返大陸啩?」佢答:「去紅磡體育館。」冇錯,朋友就係帶我睇陳慧琳最後一場演唱會。

從演唱會領略互動


講真,去一場演唱會,真係領略到乜嘢係同觀眾interaction。

呢個感受,喺正式演唱會之後最強烈。當陳慧琳嘅fan屎大嗌encore,燈好似戲院咁已經着咗,但陳慧琳走番出嚟再唱。真係好似啲股民,大嗌要求溫總理再搞資金自由行,總理又真係再搞。

不過最後,我都想恭喜陳慧琳,成功嫁出。我從未試過,因為一句說話,見到一萬幾千個香港人,自發性同一刻站起來歡呼。同觀眾interaction,我真係要向陳慧琳學習。

Thursday, June 19, 2008

「白銀拉登」重出江湖?


各位白銀戰隊成員,孫柏文作為白銀戰隊隊長,今日有重大嘅好消息。我哋白銀聖戰軍嘅精神領袖,可能重出江湖,又披甲上場再同濫發鈔票嘅紙幣狂魔決一死戰。

咁究竟呢位「白銀拉登」係邊個?就係70至80年代,大手買入白銀,睇住銀價由1 美元1盎斯,升至50美元嘅亨特兄弟Hunt Brothers。當年佢哋見到花旗國總統尼克遜,因為濫發鈔票,不能維持美元同黃金掛鈎嘅關係,決定脫鈎,推斷美元會不斷貶值。又因為當年喺花旗國擁有黃金係犯法,所以就決定買入白銀去保護自己手上資產嘅購買力。

最初,佢哋只係買實貨白銀,非常小心。點知後尾衰貪心,進入期貨市場,借錢炒白銀。買貨之多,令政府有藉口立例禁止任何一個單位持有咁多貨。亨特兄弟被迫嘔番啲白銀出嚟,最後仲要被美國政府控告操控市場,最終要宣佈破產。

雖然家族有一兩個成員喺嗰役破產,不過家族嘅生意就繼續運作。佢哋嘅家族生意,就係開採石油,公司叫做Hunt Oil。大家都知油價近年係點,亨特家族仲有大把喺手。

賣家族資產降風險

上個禮拜,亨特家族就將冇上市嘅Hunt Oil成功賣出,作價42億美元。已經有人推斷,淨係為分散風險,又遇上好多以前被譽為好安全嘅投資工具,例如AAA評級嘅債券,其實都唔安全。亨特家族絕對有理由重返白銀市場。

噚日同利世民傾過,雖然佢話亨特家族應該見過鬼怕黑,唔會再買白銀。不過我相信佢有咁嘅推斷,只因世民當年喺花旗國北部讀大學,對亨特家族呢啲德州人嘅脾性唔清楚。德州人係啲咩人?現任花旗國總統布殊就係最好例子。

當年佢老竇下台之後,出訪科威特。薩達姆派人想刺殺老布殊。雖然失手,不過小布殊絕對冇忘記嗰個想郁屋企人嘅仇家。之後係點,我毋須再提。只能講句,對於德州人嚟講,家族報仇,廿年未晚。

Wednesday, June 18, 2008

東海油田自由貿易


「冇錯,中方一向好有誠意表明願意共同開發東海油田。問題係,中方只願共同開發日方呢邊嘅油田。中方嗰邊就唔會。」幾年前,孫柏文聽到一名日本官員講嘅說話。

多年嚟都冇進展嘅東海油田開發計劃,有日本傳媒放風,話日本同祖國會好快達成協議,「一齊」開發。我作為一個熱愛和平嘅人,都算安慰。

有個我好相信嘅講法話,人類以前好多戰爭,都係因為一個國家嘅人,冇辦法以非暴力手段,得到另一個國家裏面嘅資源。所以第一個國家嘅人,就會要求政府,或者推好戰者上台,跟住就揮軍去搶。如果啲資源,一開始就係私人擁有,雖然買方係另外一個國家嘅人,兩國政府只要唔介入,買賣雙方能進行你情我願、價高者得嘅交易,就會天下太平。

公平交易可保和平


相信有部份嘅《金手指》fan屎,覺得我信以上「兩國國民自由交易能保和平論」,係好儍、好天真,甚至「自由市場上晒腦」。不過講畀大家知,兩國國民可以自由交易,就係自由貿易。

以上自由貿易保和平論,特別係戰爭必需要嘅戰略物資中有自由貿易,就係歐盟當初建立嘅神髓。歐盟雛形第一條條約,就係保障歐洲六個國家,特別係法國同德國之間嘅煤炭同鋼鐵嘅自由貿易。究竟得唔得?未有條約前嘅100年,德法打仗三次。有條約之後60年就未打過。

他朝希望日本同祖國嘅人,能夠好似德法人民今時今日嘅關係。

Monday, June 16, 2008

靠投資銀行搵錢要……

上個禮拜,好多傳言話有事嘅投資銀行雷曼兄弟,卒之成功集資60億美元,推高自己手上嘅淨資產同現金。最勁係,佢哋原先對股價有折扣嘅批股活動,最後因股價下挫,買家要出溢價,都可以成功,唔好話啲sales唔勁。

佢哋今晚公佈業績,如無意外,將會蝕一早已唱通街嘅28億美元。當然,上任冇一年嘅雷曼財務總監,就因為上個禮拜四被公司管理層降級,無緣參與業績公佈。

孫柏文呢幾日對住雷曼嗰張,由80元跌到廿幾元嘅一年期股價走勢圖,諗咗好多嘢。究竟投資銀行嘅出現,邊個人有着數、搵到錢?

如果睇股價圖,好容易覺得,投資銀行唔係啲股東有着數。不過就算唔睇股價圖,大家只要問自己,如果有壇生意,你出本金後做30倍槓桿,回報只係本金嘅百分之廿幾,你會入股做股東咩?

你可能話:「做30 倍槓桿,廿幾巴仙回報,只要夠穩陣,冇問題!例如有兩種風險一樣嘅投資項目,不過有回報差別,就可以一拋空另一買入做套戥。」我知!例如搵兩種都係風險評級AAA嘅債券!最弊,現在唯一有用嘅AAA標籤,就係擺喺電視機遙遠控制裏面嘅電芯。做投行股東?好辛苦。

投行僅員工搵到錢

靠投行搵錢,做員工先得。每年大家聽到啲幾十個月花紅,全部都係投行員工攞。仲有,做員工只需求神拜佛,到年尾冇事,現金花紅就可以穩袋。

你可能話:「驚員工只望年尾冇事,咪發認股權畀佢哋,等佢哋同股東同一條船。」理論上係。不過,如果走火入魔、濫發認股權,最後就會攤薄股權,除非積極回購。

後果係點?《紐約時報》話,雷曼兄弟對上13季,盈利總和係119億美元,但就用咗118億美元回購公司股份,股份總和仲有升無減。知道點解啲花旗國公司員工,咁抗拒修訂認股權會計上嘅成本啦!

Friday, June 13, 2008

Have a nice weekend everyone


Co-existence.

推中央屠宰要解決的問題

孫柏文作為一個深水埗居民,作為一個會耐唔耐去深水埗公園隔籬嘅公共泳池,喺游水前池邊拉筋,見到好多雀屎嘅深水埗居民,我絕對關注任何關於H5N1禽流感嘅新聞。上個禮拜,一聽到電視機話保安道街市有死雞驗出有H5N1,我第一個反應係:「Oh no,又係深水埗。」

噚日,我喺屋企對面街,標榜鹽焗雞為招牌貨嘅茶餐廳食午餐。坐喺收銀處同我張枱之間嘅幾個街坊,議論紛紛抨擊政府又想再推雞隻中央屠宰政策。講得興起,連收銀都加入討論。

活雞好過冰鮮是偏見

我作為特區唯一一個自由市場政策智庫組織嘅研究總監,忍唔住問個收銀:「yi家冇晒活雞賣,有冇影響鹽焗雞供應?」
收銀:「冇事,我哋用冰鮮雞。」
我:「原來你哋啲鹽焗雞一路都係用冰鮮雞。」
收銀:「唔係!唔係!有活雞就梗係用活雞。」
其中一個侍應生就插嘴:「活雞梗係好食過冰鮮雞。」

我相信問題就喺度,社會普遍相信活雞好食過冰鮮雞。不過點解會咁諗?如果好似啲日本消費者咁,喺試味嘅情況下,唔知道啲和牛牛肉喺邊度出產時,個個話澳洲牛肉最好味。不過一知道牛肉產地,就改口風話日本牛最好味。如果「活雞梗係好食過冰鮮雞」只係偏見,我就希望賣冰鮮雞嘅人做啲嘢。

提高速度加強競爭

不過如果活雞真係好食過冰鮮雞,我相信呢個就係控制供應鏈嘅問題。冰鮮雞同活雞最大分別,就係啲雞被宰殺後,要用幾多時間先至煮。中央屠宰如果要得到市民支持,就一定要令市民覺得,雞被宰殺至到屋企煮嘅時間,係比現有街市賣活雞嘅制度快。

如果由打電話、到焗、到送嚟屋企,一塊pizza只需40分鐘。冇理由送雞做唔到。唔通要搵供應鏈專家利豐(494)幫大家諗諗?

我最笨實

今個禮拜,喺花旗國有幾件事我覺得值得留意。其中一件係香港時間禮拜一晚,加州蘋果電腦總裁Steve Jobs,會講吓佢哋嘅3G iPhone。噚日,上面《案內人隨筆》嘅尹思哲都有講。

早幾個禮拜,3G iPhone將會在今周出台嘅消息,已吹到如火如荼。孫柏文當時覺得,iPhone就係iPhone,3G同2G嘅分別,只會係上網速度。功能上,可能有少少修改,不過大致上都係差唔多。最多只會改吓電訊商收費模式。

亦因為我鍾情2G iPhone無線上網嘅用戶界面,不過又對打電話服務冇興趣,所以喺上個禮拜,我就上網用二千幾元,買咗減去打電話功能嘅iPhone,即係買咗部 iPod Touch。蘋果電腦亦表示會喺禮拜二送到。

神髓在於不斷被淘汰


點知禮拜一晚,Steve Jobs公諸於世嘅3G iPhone,從功能到軟件都大躍進。仲話賣199美元。到禮拜二收到我部iPod Touch時,我唯一嘅感覺係好耐已經未試過,買樣嘢連盒都未開,嗰樣嘢已經obsolete被淘汰

同同事講起,諗住佢哋會安慰吓我,點知仲要俾佢哋「提點」。話我最好拿拿臨攞上eBay賣,都仲可以攞幾嚿水。

呢部iPod Touch,係我第一次買蘋果電腦產品畀自己。以前唔明白點解啲人買蘋果電腦產品時,會投訴啲產品被淘汰,因為科技產品嘅神髓,就係一路不斷被淘汰。今次之後,我明白點解會嘈,因為啲產品可以被淘汰得咁快。

以前微軟Bill Gates曾經安慰過買電腦嘅人,話:「冇錯,你今日買嘅電腦,會因為科技進步,不斷大幅貶值。不過部電腦每日能夠促進嘅生產力、提供嘅娛樂,絕對能夠彌補每日嘅貶值成本。」我只可以話,嗰條友肯定冇買過Steve Jobs揸fit嘅蘋果電腦產品。

Thursday, June 12, 2008

Too little too late?

Check out what HSBC Chairman Stephen Green have to say about a bank's way of doing business...

"It's not the end of a bubble, it's the end of a business model," he told delegates at the British Banker's Association yesterday.





Wednesday, June 11, 2008

高油價下政府做啲乜

正當一個政府嘅行政機關,由上至下都唔係選出嚟。佢哋想推政策時,面對一個全面開放嘅傳媒,往往需要做大量民意調查,攞啲對政府有利嘅結果。如果民調結果「唔靚」,政府就會輸打贏要。

如果個民調喺網上做,網民睇到即時結果,政府分分鐘會成個民調抽起。大家一定估,孫柏文講緊香港政府。錯!我講緊歐盟政府。

噚日,有封嚟自立陶宛嘅電郵,嗰位叫Silenas嘅仁兄話,歐盟委員會主席網站,做關於生物柴油政策民調。點知超過九成回覆,都係反對生物柴油,啲官見唔對路,即刻抽起個民調,跟住話個民調俾人騎劫咗。大佬呀!九成人反對,絕對正路。唔好話啲要捱貴糧嘅市民反對,淨係嗰啲真正識嘢嘅環保分子,知道生物柴油喺生產同製造過程中極之唔環保,所以反對,都已經夠九成人。

我作為一個深信環保嘅人,睇見今時今日嘅油價,真係有啲安慰。只要油價冇政府政策扭曲,全數轉介消費者,全球60億人就會自發諗方法,將每滴油,每嚿炭用盡。

肥人應加燃油附加費

例如,大家作為《金手指》嘅fan屎,都知我唔係細隻。現在喺花旗國,就有人吹話肥人搭飛機,可能要收多啲燃油附加費。一吹,就有反歧視嘅人要求政府介入,禁止航空公司有咁樣嘅政策。我作為肥人,都支持畀多啲燃油附加費,始終架飛機載我要用嘅油,真係多過載啲100磅有找嘅港女。

一向以嚟喺花旗國,啲環保分子都要求政府立法,迫啲汽車生產商造慳油車。今時今日仲使迫?又或者啲航空公司,已經將啲最食油嘅舊飛機,全面淘汰。又同時改變飛航路線,盡量將油用得有效率。

所以,噚日見到貨車司機喺皇后大道中示威,要求政府對高油價「做啲嘢」。求神拜佛政府千祈唔好。我希望嗰啲只係識令人蛙牙,反對膠飲管嘅「環保人士」,知道下次有司機示威時,出嚟對質。環保硬膠大戰搵食車司機?有趣、有趣。

Tuesday, June 10, 2008

我挺「十三萬助理」陳智遠

副局長同政治助理,引發嘅社會討論,未有迹象會停。冇辦法,今次啲人選同佢哋嘅背景,拍埋佢哋要擔當嘅角色,就有如送畀每個香港人一塊鏡。畀大家照吓個心,睇吓心底裏乜嘢重要同唔重要。

情況就有如早前無綫電視節目《一百萬人的故事》,照出社會裏嘅貧困。今次啲政治人選,就照出社會裏民建聯中人,攞外國國籍嘅愛國偽君子(佢哋真係覺得,高級黨員入外國國籍,效忠英女皇,對民建聯真正愛國嘅成員係冇嘢)。

工作經驗少有原因

今次亦照出,我哋香港人對請人做嘢,履歷、工資關係嘅情懷。例如,創辦Roundtable,候任食物及衞生局長政治助理陳智遠。被人笑話佢之前人工得幾萬,得三年工作經驗,Yi家月薪有十幾萬。十幾萬月薪,即係計年薪,攞個齊頭數,陳智遠就係《一百萬銀的故事》。爛gag?係。

不過,如果因為陳智遠得三年工作經驗,所以大家覺得佢唔應該做政治助理,我就會話唔公平。陳智遠28歲,孫柏文30 歲,如果三年一代,我同佢就同一代。作為同代人,我係完全明白點解佢嘅工作經驗咁少。我同佢嘅分別,就係我曾經長時間雙失,佢就冇雙失,起碼冇失學,攞多兩個碩士學位。

點解會有咁嘅分別?因為當年我一廂情願,信咗特首董建華嘅「經濟將會短期之內復蘇」。當時覺得「短期之內」應該係一年之內,如果一年之內有工做,咁就唔可以攞啲一年長嘅學位。不過,陳智遠就冇我咁儍咁天真。佢就「一注獨贏買經濟差」,就係咁,所以有兩個碩士學位。

重返校園因經濟差

再講,有《金手指》fan屎喺我個blog度,話陳智遠嗰兩個碩士「流流哋」。話識大學教育嘅人,都會覺得攞嗰兩個碩士嘅人,唔慌勁得去邊。

我冇能力反對呢個論調,不過就算嗰兩個碩士「流流哋」,大家一定要明白點解陳智遠都會去攞。橫掂一年之內都冇入職機會,就不如重返校園,有咁癲玩咁癲,有咁喪玩咁喪。學位?學嘢?醉翁之意不在酒。

最後,如果因為陳智遠嘅工作經驗,令特首曾蔭權有麻煩。只不過等於曾特首,再一次要為董建華留下來嘅政治炸彈拆彈。未見到政治助理做啲乜之前,我挺陳智遠!

Sunday, June 08, 2008

入籍時已過底線

曾蔭權為首嘅香港政府,卒之搞咗個「棄籍潮」出嚟,去平息因為副局長同啲政治助理有雙重國籍嘅風波。講真,連最想打爆行政機關嘅立法會一眾議員,都只能喺佢哋嘅薪酬上鬧,咁即係肯定咗特首曾蔭權嘅話,副局長同政治助理有雙重國籍冇法律問題。

溝通不足產生民憤

不過,孫柏文曾經講過,以前克林頓處理「白水門事件」Whitewater嘅教訓一樣,凡事話「冇法律問題」,只會衍生好多政治問題,最終令政府說服人民、推行政策嘅能力降低。

「白水門事件」冇錯真係冇法律問題。不過,因為克林頓一開始冇當係政治問題,所以對市民溝通不足,產生民憤。亦因為有民憤,所以克林頓就要搵個獨立調查員去安撫市民。點知個獨立調查員最後就查到冇嘢查,居然畀佢搵到萊溫斯基同埋條有「克林頓料」嘅裙。

講番雙重國籍件事。爆發之後,最初居然完全冇人出嚟交代。所以市民對佢哋嘅第一個印象,就係畀我哋呢啲評論員完全控制。最後卒之出聲時,居然會話「用人唯才」。

非關國籍用人唯才

講真,任何一個香港人如果心臟病發,要做手術,我相信絕對唔會介意個醫生有乜嘢國籍,用人唯才。因為份工真係需要才能。不過當市民根本唔知呢班人有乜嘢功能時(因為未有呢啲職位之前,世界冇停過),就會有好多主觀要求,呢班人先至可以達標。

如果陳德霖就連呢個基本道理都唔明,佢根本就係無能。我可以講句,陳德霖如果他朝真係做咗金管局總裁,就係時候沽爆港元。

e家啲副局長全部都放棄其他國家嘅國籍。大家心情,真係平復咩?其實,政府如果覺得佢哋放棄國籍,我哋就ok,簡直係太天真太儍。因為佢哋選擇入其他國籍時已過底線。已經過咗可以說服香港人心嘅底線。為咗拯救廣大政治問責嘅大業,呢班第一批曾經有過雙重國籍嘅人,早走早着吧。

Saturday, June 07, 2008

Oil...

These are the days that makes me nearly miss being an oil stock analyst.


Thursday, June 05, 2008

Go Wings!

王永平文章貼牆有因

呢幾日,孫柏文喺辦公室一得閒,就會擰轉身欣賞貼喺頭後面,一篇喺6月2日刊登於《信報》,題為──進一步發展問責制「出閘脫腳」嘅文章。呢篇文就係特區政府前問責局長,一向講嘢非常忍住嘅王永平寫嘅。

佢老人家篇文,真係值得大家睇完貼牆。篇文冇錯舉出好多關於今時今日政府推副局長同局長助理嘅問題。不過呢個只係令篇文值得睇,要貼牆嘅原因,就係因為正當我哋對於「究竟有冇政治人才」呢個問題上,已經去到「唔通真係要搵到呢啲人」嘅悶局。呢篇文就有如一片春風,激起我的心。

游擊隊式政策意見

今時今日嘅現實,就係有最多政策、政治人才嘅「黨」,係嗰班政務官,即係「AO黨」。咁如果佢哋係最令人信賴嘅「執政黨」,究竟喺特區中,又有邊班人可以鬧啲在任 AO。市民未聽到鬧乜,都已經覺得應該鬧得有根據?

冇錯!我覺得大家要將王永平篇文貼牆嘅原因,就係因為喺市民心目中,可以鬧啲在任AO,鬧得應該有根據嘅一班人,就係啲前乜前物局長,同退咗休嘅議員。問題就係王永平篇文,同時代表游擊隊式嘅政策意見建議渠道,咁樣太浪費。一定要搵方法,制度化呢個渠道。最好仲要呢個渠道係擺到明攞嚟鬧政府。

設上議院分享意見


所以今日,孫柏文又再一次玩「假如我係特首」,宣佈如果可以的話,就會成立完全冇權力嘅上議院。上議院成員就係所有97年之後嘅前乜前物局長,同退咗休嘅立法會議員。

上議院功能,就係畀佢哋講嘢,分享老人家意見。佢哋可以動議表決,不過冇約束力。講完就可以返屋企湊孫仔。不過,我諗要去到2017年,我40歲,成功成為最年輕特首之後。啲人批評我唔夠經驗,我就可以大條道理搞呢個上議院。到時因為係作為特首嘅我,邀請啲老人家嚟鬧我,佢哋亦都可以放下「干擾新一代執政黨」包袱。

below is his piece.
------------------------------------



進一步發展問責制「出閘脫腳」

By 王永平

  二月二十日,行政長官曾蔭權宣布委任第一批共八位副局長,並強調這是「發展問責制的一個重要里程」。他說:「這批副局長會協助各局長,落實我的治港藍圖和施政綱領,使到政治班子更好地為香港市場服務。」

  讓我們首先回顧實施問責制的主要原因。香港於一九九七年回歸祖國後,新成立的特區政府面對一連串的內部管治問題,例如新機場啟用時的混亂和處理禽流感時的錯失。當時政務司司長陳方安生最初拒絕為機場失誤承擔個人責任,被一向親政府的報章批評。要求政府高級官員,特別是主要官員,就有關的政府政策及決定問責,成為一項新的迫切政治問題。特區政府面對的信心危機是如何向市民履行「港人治港」的承諾,避免這金句變成「無人負責」的空話。

集體負責制成為陳迹

  在這樣的環境下,公共房屋的短樁醜聞便引致當時房委會主席王䓪鳴的呈辭。同時,大多數立法會議員及市民大眾要求房屋署署長苗學禮問責辭職。這件事成為駱駝背上的最後一根草,「集體負責」的原則,化作歷史陳迹。

  民望不高的董特首在第二任期開始時推行的問責制,便成為少有被市民接受的政策。其實問責制就是部長制。部長不是公務員。全世界的部長都要效忠政府及最高領導,例如總統、首相或特首。有需要時,他們要主動下台,而是否下台,視乎當時的民情及政府和最高領導是否承受風險、抗衡民意。部長下台原因純屬政治事件,包括個人德行,毋須通過什麼有規有矩的紀律程序。

  在問責制下,政治委任的主要官員辦事不一定比專業及有經驗的公務員能幹。前者須具備的條件是對特首絕對忠誠、在立法會內取得支持政府的票數及得到市民支持或「受落」。公務員要聽命主要官員,是政治現實(但同樣重要的原則,是保障公務員的政治中立。這是題外話,將來有機會再詳談)。

  「問責」二字,成為推銷新制的開門密語,獲得立法會及市民的支持。現在如果你問一般市民問責制如何改善政府管治,你不會得到清晰的答案。但是屢次民意調查顯示市民大眾接受問責制,這是什麼原因呢?

因「失敗」而「成功」

  我認為原因充滿諷刺。問責制的「成功」,建基於數位問責官員的「失敗」。梁錦松因宣讀財政預算案前買車,損害個人誠信、黯然下台。

  楊永強處理「沙士」時失言,引起公憤而主動呈辭。葉劉淑儀說她在五十萬市民上街抗議二十三條立法前已萌去意,這是有紀錄的事實,但她推行二十三條立法遇到的極大回響,是否已埋下她離開的種子?假如她沒有決定離開政府,五十萬人上街後,她還可以繼續當保安局局長嗎?

  當特區政府草擬問責制的安排時,政務官,包括已當上了司、局長的主要官員,是一如既往的專業,但不能說對這項新政策充滿熱誠。陳方安生不喜歡問責制,是公開的機密。她在問責制實施前離開政府。我當時任公務員事務局局長,認同政治委任的部長制是不可逆轉的發展,所以我致力制定保障公務員政治中立的具體安排。我當時已認為問責制一旦實施,便不會原地踏步。像一般的政治體制,問責制會繼續發展及膨脹。

  曾蔭權當上特首,便把發展問責制作為他五年任期內的一項主要政策。同時,為了確保政治委任的官員對他絕對效忠,他緊握委任所有副局長及政治助理的權力,儘管後者根本不會與他在日常工作上有任何接觸。

加強政治能量更有效施政

  進一步發展問責制的理據,可以在政府發給立法會及市民的文件中找到。我不打算在這裏覆述的主要原因,是我認同政府有需要加強政治能量,應付立法會、傳媒及市民大眾,令施政更有效。因此,不少有傳媒背景的人士獲委任為副局長或政治助理,是意料中事。

  令我震驚的是政府初期企圖把國籍事件,淡化為個別傳媒炒作的小事。當有關的主要官員相繼把這明顯的疏忽解說為保障私隱和符合或不違反《基本法》的條款時,我簡直難以置信!

  想起克林頓在一九九二年競選美國總統,最終擊敗老布殊時,用的口號是:「這是經濟問題,蠢才!」我幾乎想喊:「這是政治問題,蠢才!」  

行政長官宣布委任八位副局長時,讚揚這批副局長「有抱負、有魄力、有熱誠」,並說「他們會加強整個政治團隊的實力和施政能量」。秉承「我會做好呢份工」的承諾,曾特首能否說服他的兩位「老闆」,即中央政府及香港市民,特區政府的第二梯隊治港人才,不會因為擁有外國國籍便失去他們的抱負和熱誠?世事無絕對。中國不承認雙重國籍,或者中央政府可以選擇把外國護照看成旅遊文件?

  但比較保險的做法是補救錯漏,說服有關的副局長放棄外國國籍,讓他們明白,這是服務香港市民的小小代價。

  執筆至此,看到蘇錦樑副局長宣布放棄加拿大國籍的新聞,這是意料中事,因為我不相信他會選擇退出民建聯或堅持撑下去,無視快到的立法會選舉。其他擁有外國國籍或居留權的副局長已經沒有選擇,結局已經寫在牆上。他們愈早宣布唯一的決定,對政府及其他副局長愈好。

玩政治不能「又食又拎」

  政府可以繼續堅持按《基本法》的條款或空子辦事,不同意副局長獲委任時須放棄外國國籍,但我相信充滿政治本能的曾特首不會讓國籍爭議再次出現。時間會證明我是否說錯。

  國籍事件適時地提醒新一代的「政治人才」,政治不是一個規例分明、友誼第一的遊戲。不要埋怨政府口惠實不至,或其他人、特別是傳媒不講理。說得俗些,玩政治,豈能「又食又拎」!

  事實上,在政治險途上,放棄外國護照可能是副局長最容易做到的事。你要做的,是百分之一百的政治工作。你要贏取政府內外的尊重,就要顯示你的高度政治敏感和能力;曾特首沒有跟你說過嗎?

  我仍然對曾特首的政治智慧和拆彈能力有信心,他不會容許這件事影響他的民望。但恕我在題目內用了一句所有熱愛跑馬的香港人都懂的術語。「出閘脫腳」的馬匹不一定落敗,但騎師及馬匹要加倍努力了。希望政府和副局長政治進步。

  前特區政府問責局長、現任中文大學兼任教授

The missing helicopter in 四川

Was watching the news the other day about the helicopter that is now missing in 四川 after it crashed.

The helicopter was assigned to rescue people in 四川. But it crashed.

And because it was painted in Camouflage pattern. It is hard to see it from the air to save it.

Anyhow. I did talk about the subject of using Camouflage painted vehicles for save and rescue missions, such as a fire or earthquake, on the Apple Pie Show back on 14th Feb 2008.

Check it out!

What do you think?

I think the Central Govt has changed ALOT at earthquake rescue. Especially about their attitude towards the value of life (ie. no more wasting human lifes) and also about letting private citizens helping (the govt no longer monopolizes rescue and relief). Good thing.

Wednesday, June 04, 2008

問題少年 太多問題

噚日,孫柏文同大家分享過幾日前一位中學生寄嚟嘅信。佢問點解政府搞到佢日日返學都要唱國歌、睇升旗禮,話要佢愛國。跟住特首就話選擇入其他國籍嘅人,都可以喺日日強調要愛國嘅政府裏面,擔任要職。我都係嗰句。我唔知。我呢代打上嘅香港人,可能比較務實。唔會點思考呢啲矛盾,不過後生嘅一代,就可能會。

噚日同大家分享過呢位中學生帶出嚟嘅矛盾之後,就有其他後生仔女,寄信嚟分享咗困擾佢哋好耐,政府製造出嚟嘅矛盾。

唔同人有唔同機制

第一個問:「我今年開始可以投票,亦有登記。好期望喺立法會選舉中投票。不過,點解立法會就要『多議席單票制』,而區議會就要『單議席單票制』?兩個機制都有利有弊,不過政府衡量過之後,點解唔解釋吓邊個好啲?理由係乜?點解唔係所有選舉用同一制度?」我答:「都係嗰句。我唔知。」

第二個問:「見到海關,因為有人將電子遊戲機改機,令到啲可以去玩翻版遊戲,所以去拉人。咁係咪所有人改、製可以玩翻版嘢嘅機,都應該拉呢?我中學有個好寸嘅人,買咗部要改機先至可以上台打電話嘅iPhone,點解唔拉佢?政府可唔可以解釋吓?」我答:「唔知。」

第三個問:「有立法會議員要求政府,公開副局長同局長助理嘅薪酬。因為現時,政府淨係講過,佢哋兩個級別可以有嘅最高同最低薪金。不過,點解立法會議員同局長本身,又會劃一薪酬?彈性處理薪金,可以明白。劃一又有理據。點解一部份人要面對一套薪酬機制,另一部份人就唔同?」我答:「我都想知。」

太多矛盾等待回應

第四個問:「點解送免費膠袋,就要收膠袋稅,不過免費報紙就冇?免費膠袋就驚人會浪費,咁每日要印幾百萬份免費報紙呢?」我答:「免費報紙要抽稅?Good good。」

第五個問:「我家中婆婆,淨係識講鄉下話。佢又需要人照顧。點解唔可以請鄉下嘅同鄉來港做家庭傭工,只可以請唔識講中文嘅菲律賓、印尼人?」我再加問:「咁嗰兩個國家嘅華僑就ok?」

太多矛盾。出嚟答吓。唔該。

入籍加拿大宣誓詞

噚日,施永青同我去有線電視,做咗節目《Money Cafe》嘅嘉賓,討論副局長同局長助理嘅嘢。施永青發覺,今次班副局長出台,引嚟咁多風風雨雨,唔係冇好嘅一面。

特別因為民建聯副主席有雙重國籍,而爆發出向佢嘅批評,就令我哋香港人好好諗吓國籍、效忠、宣誓等問題。經過思考,我好同意施永青嘅見解。《蘋果日報》幾日前收到封信,係一位中學生寄嚟。佢問:「我日日返學都要唱國歌、睇升旗禮。我覺得做中國人一定要認真,家睇到咁多副局長有外國國籍,特首又話咁樣冇所謂。究竟做中國人係咪冇需要咁認真?」就連小朋友都一齊思考,幾好!

做中國人要認真


我知道搵呢班人返嚟做副局長同助理,其中一個主要功能,就係解答立法會或傳媒,對政府問題嘅質詢。

今日,唔使對付喺傳媒工作嘅我,孫柏文只係想當年選擇入籍加拿大嘅民建聯副主席蘇錦樑,答一答呢位學生。

仲有,因為曾蔭權、李柱銘、Sharon Stone,都曾經用過英文,繙譯成中文之後被人大肆抨擊。所以今日,我只會提供入籍加拿大嘅英文版宣誓詞。

I swear(or affirm)that I will be faithful and bear true allegiance to Her Majesty Queen Elizabeth II, Queen of Canada, Her Heirs and Successors, and that I will faithfully observe the Laws of Canada and fulfill my duties as a Canadian citizen.

民建聯副主席蘇錦樑副局長,不如分享吓,當時佢讀出以上宣誓詞嘅感覺。

宣誓當食生菜

蘇錦樑講完佢嘅感覺之後,相信你哋作為《金手指》嘅fan屎,就會向佢分享你哋對佢再為任何嘢作宣誓嘅感覺。

我已經從同fan屎嘅心靈感應中,感受到你哋嘅擔憂。冇錯,宣誓當食生菜,真係為佢老婆擔心。

最後,如果你覺得今時今日啲年輕人對國家不夠熱誠、太過兒戲。要怪就怪啲長輩吧。

名酒拍賣的回應

啱啱過咗嘅周末,有好多令孫柏文思考嘅新聞,今日想做啲回應。禮拜六,就有場名酒拍賣會。我哋《蘋果日報》都用咗半版紙、三篇文去報道。亦有兩隻酒嘅名用咗嚟起題,第一隻就係紅酒Romanee Conti,第二隻就係香檳Dom Perignon。

而嗰日就有箱90年Romanee Conti,以每支平均價15萬賣出,95年Dom Perignon都要6.7萬先買到一支。

經濟泡沫暴發戶多

今日想做回應嘅原因,係因為我以前聽聞李嘉誠都睇嘅漫畫《課長島耕作》。漫畫係講條友喺日本大公司打滾嘅經驗,提過呢兩隻酒。

當時已升職為部長嘅島耕作,就話以前日本泡沫經濟最瘋狂,即係80年代尾,日經平均指數喺4萬點時,有啲日本人,Romanee Conti同Dom Perignon一齊飲。

大家唔好誤會,唔係枱面有兩隻杯咁飲,而係將Romanee Conti同Dom Perignon倒埋一隻杯裏面,撈埋嚟飲。如果你係個wine snob,我已經感覺到你皺起眉頭。不過,每次返大陸見到有wine snob因有其他人用紅酒撈七喜而有微言,我就會分享呢個島耕作故事。

賑災民運同日搞

噚日,有班熱心歌手義演,為四川地震災民搞咗次形式真係有啲似當年「民主歌聲獻中華」嘅演唱會。同日,咁啱支聯會就舉辦咗次遊行,悼念六四死難者。

支聯會嘅遊行,就係叫做「愛國民主大遊行」。唔知啲土共,例如民建聯會員等,見到支聯會搞悼念六四嘅遊行,打正旗號話係愛國點睇。

不過我喺度諗,究竟噚日「愛國民主大遊行」參與者中,有雙重國籍嘅人多,定係有雙重國籍嘅副局長、助理多。