Thursday, July 10, 2008

分析員主導市點炒

近排,唔知大家有冇好似孫柏文一樣,突然感覺到啲投資銀行股票分析員影響力,好似多咗好多。未爆發次按帶來嘅金融風暴之前,啲分析員出報告,改吓啲評級、郁吓啲目標價,啲股價升跌有限。而大家亦會覺得,啲分析員喺報告裏面寫嘅嘢,有「亞媽係女人」之嫌。

不過,自從舊年8月爆發金融風暴之後,啲分析員喺冇新聞、新消息嘅情況之下出報告,都可以令股價勁郁。點解呢?例如前晚喺花旗國,雷曼兄弟有個分析員行出嚟話:「其實有條已經存在咗好耐嘅會計條例,如果兩大按揭信貸機構Freddie Mac同Fannie Mae唔想牴觸,就要集資好鬼多百億元。」

報告左右股價升跌


講真,花旗國樓價下跌就全世界都知。嗰兩間F字頭按揭信貸機構,做50倍槓桿,即係用2蚊資本,再借98蚊,做100蚊生意,呢個現實,就連我哋《蘋果日報》喺2年前都講過。咁點解雷曼兄弟只係重複舊話,居然可以令佢哋嘅股價一日之內跌17%?

無需要講到咁遠,睇番我哋特區。以前,當啲比我後生嘅人問我:「我想做分析員,有冇入門貼士?」我經常答:「做分析員工作其中最重要嘅一環,係要喺上市公司出業績前,能夠推算到公司業績。而如果想試吓,入門第一間分析嘅公司,就可以揀港交所(388)。試問有邊間上市公司,會每日好準時咁喺4點幾鐘,公佈當日嘅生意額?」

不過就算好似港交所咁嘅絕對高透明度公司,呢排都可以喺冇新聞情況之下,被分析員報告移動。點解呢?唔好同我話佢哋對港交所嘅分析特別有建樹,咪又係嗰四個字「成交額跌」。

如九十年代科網泡沫

其實如果要我估,情況可能返去90年代尾,花旗國股市。當年dotcom泡沫,好多新科技同埋新嘅營商模式出現,你可能喺雜誌或報紙見過,雖然講到好勁,不過你冇買嗰間公司嘅股票。但有分析員一講,就有權威肯定咗之前已經知嘅嘢。

咁嘅市,最難炒。因為如果新聞主導,大家可以同時間作反應。不過如果分析員主導,你又係咪佢肚裏面條蟲?知道佢又會舊話重提?

No comments:

Post a Comment