Thursday, July 17, 2008

美版「八萬五」的標準答案

最近,房利美Fannie Mae同房貸美Freddie Mac分別出事,要政府大手筆打救。大家可能會話:「又出事仲咁嚴重!咁喺美帝生活緊嘅人咪好慘?」咁啱早幾日,我同去完美國上course嘅《蘋果批》高明輝傾起呢個話題。

孫:「美國人家係咪一片愁雲慘霧?」

高:「我唔直接答你,我用例子答。有個美國仔AW帶我去美國一個小鎮買SMS電話卡,點知嗰頭比較荒僻,冇得單買卡,要連手機一齊買,價錢仲要同齋買卡差唔多。我即刻話:『It doesn't make sense for me to buy a cell phone. I have it!』AW就話:『This is America!WE WASTE!』」

聯儲局大把銀紙印


孫:「呵呵呵……今次房利美同房貸美出事,以二戰之後嚟計,通常一有呢類危機,美元滙率會上升同美國國債長息都會下跌,因為啲人爭住兌換可以保值嘅美元同美國國債。不過今次就冇,仲見到美元下跌。」

高:「其實問題出喺聯儲局度,畀得太大隨意性佢印銀紙。打伊拉克冇錢?印銀紙囉!醫療制度開大個頭冇錢?印銀紙囉!次按出事,銀行券商冇錢?印銀紙囉!原先冇事嘅銀行或券商,見到輸得唔夠大鑊政府唔救,會點做?結果蔓延開去,個個都不負責任,反正輸得多有政府救。政府銀紙越印越多,印得多,大家對佢都冇晒信心,因為個個都要救,都唔知你救得邊個。」

孫:「如果美元本身都唔值錢,廢除美元,咁美國政府抽稅用咩貨幣?」

濫發鈔票逃避問題

高:「假設冇中央銀行,就連最對政府最冇信心嘅美國人都會忍唔住問句:政府唔印銀紙,咁點算?」如果呢條問題問一個美國人,佢可能唔識答,但任何一個香港人都可以答你:「唓!香港咪又係3間上市商業銀行發鈔。滙率一直相安無事。」

諗美國抽稅用咩貨幣,不如諗美國效法香港,開放發鈔制度。譬如話,任何銀行拎住若干金銀實貨,就可以印一美元,銀行要有成本咁印銀紙。咁聯儲局濫發鈔票嘅問題會「唔存在」,抽稅貨幣問題亦都「唔存在」。

孫:「你同我一樣,都對聯儲局睇得好灰喎!」

高:「最近港台有個小學通識問答比賽,其中一條問題問『形容一個人有逃避問題嘅性格,會用咩政策去形容』,有位香港小朋友答『八萬五』,傳為一時佳話。如果呢條問題有美國版,美國小朋友一定會話:『係聯儲局!』

No comments:

Post a Comment