三奉曾淵滄之命講石油

今日繼續奉曾淵滄教授之命講石油。之前孫柏文曾經講過，油價短期走勢係冇得預測。油價只能從長遠角度咁預測，而長遠嘅預測就係睇供求。

之前我亦講過，根據英國石油公司BP嘅數據統計資料，07年九成幾嘅石油需求增長，都係來自有石油補貼嘅地方，所以要估需求，就要估世界各地政府對於補貼嘅政策。一個國家嘅政府，點解要補貼油價，作為《金手指》fan屎嘅你，都應該唔需要我多講。

攞任何一個政府領導人為例，佢哋嘅最終目的，就係繼續執政。民主社會就叫呢個目的為「成功連任」，喺大陸就叫做「一黨繼續專政」。

補貼為保政權

今時今日，無論伊朗啲神職人員、緬甸軍政府、馬來西亞嘅全國巫人統一機構，通通都感受到高油價，對佢哋能否繼續執政，構成壓力。又或者國家原本冇事，但因為削減補貼，令市民造反。

咁點解補補吓貼又要減？係咪忽然中咗「自由市場」毒？我都想。其實，減補貼嘅原因好簡單，就係因為政府財務上頂唔順。一旦國家有長遠嘅財政赤字，最終都係國家破產，結束執政地位。

如果你係啲領導人嘅顧問，要喺減補貼帶嚟市民造反，或國家最終破產黯然下台之間作取捨，你會點建議？如果你兩個之中揀咗一個，唔怪之得你唔係啲國家顧問。

現在最流行嘅建議，就係唔減補貼，不過不斷同啲領導人話：「唔使減補貼。高油價只係短暫現象，來年會回落，啲大行專家就係咁講。」所以先唔係點見到大規模減補貼。

蔓延至所有燃料

仲有，因為好多國家嘅補貼政策，已經蔓延至所有燃料。要減就會鐵索連舟，好麻煩。

用印度為例子，嗰度啲自由市場組織、環保團體，都好驚印度政府突然減柴油補貼。

大家一定覺得好怪，減補貼，用少啲，唔好咩？原因係印度啲柴油車司機，如果見柴油價貴，就會用好平、有補貼嘅火水做引擎燃料。到時損耗機件又多廢氣。咁點解火水有補貼？因為想啲人煮餸唔好咁貴。

問題就係，原本只想減柴油補貼，不過要成功就要減埋火水補貼。你會點建議？冇錯，都係求神拜佛啲大行專家嘅預測啱。

最後，大家唔好笑人。特區私家車司機，見油價高會點？咪減少揸車，搭多啲的士。咁的士嘅石油氣又有冇補貼？世界各國唔減補貼，需求又會點？