買佢冇事博倍升

「唔係真係會有事？」記得喺2000年dotcom泡沫爆破時，孫柏文仲喺花旗國，亦有炒股票。當年毋須日日睇住個市，淨係聽吓我啲去咗加州搞高科技嘅舊同學口中嘅消息，都知道有好多間公司會出事。

絕望與希望間搵食

絕大部份時候，舊同學講嘅有問題公司，我都會答：「抵佢啦！都唔知間公司為乜？」

不過，有時聽到喺泡沫最瘋狂時，如日方中嘅公司都會有事，我都會忍唔住話：「唔係真係會有事？」

講真，喺科網泡沫嗰一役，其中一個我見到關於炒賣股票嘅現象，就係當市場對於一間公司能否繼續存在開始出現懷疑態度，股價波動可以好大。因為市場投資者，會不斷喺對公司完全絕望同些少希望間掙扎。

如果能夠捕捉時機，喺市場對公司嘅絕望同希望做炒賣，利潤可以相當豐厚。近期最佳例子，就係啲花旗國銀行股。

今時今日特區股市中，有兩隻股票喺舊年「資金自由行」泡沫中被人進取買入，因為行業同公司都被人感覺係如日方中。呢兩隻股票就係製造紙張產品嘅玖龍紙業（2689）同理文造紙（2314）。

信貸緊張難借新錢

兩間公司嘅股價，舊年最瘋狂時炒到廿幾三十蚊一股。到噚日，得番一兩蚊。能夠解釋股價大幅下滑嘅最直接原因，就係佢哋兩間公司都因為對上幾年喺全球信貸泡沫中，過份借貸。

現在對紙張產品嘅需求將會出現下滑嘅情況下，已經大鑊。最弊，兩間公司都有好多短期債務，當年諗住到期可以借新錢還，今時今日信貸緊張，令投資者唔知嗰兩間公司可以點算好，所以就令到嗰兩間公司嘅股價，跌到我覺得已經反映市場認為佢哋可能會出事。

問題就係，兩間公司同時有事？唔係冇可能。不過以現在股價水平，可以小注怡情咁博博──博佢哋有人救。

當然如果喺兩間中揀，就要問問自己邊間被打救，對「救生員」嘅成本低啲。就係喺咁嘅時候，大陸政府先至可建立順我者昌嘅形象。玖紙主席張茵為國家政策勞動法，曾經組織反對勢力。你話點搞？