嬲到掟電話

大學教授伯南克，一向講嘢畀人嘅感覺，就係佢點撻都唔着，更唔好話會怒爆。金融海嘯，通街血肉模糊，伯南克都係好冷靜，最多係演講時聲震震。

不過佢老人家早幾日話早排有次聽電話，嬲到掟電話。

為乜咁嬲？咪就係AIG。話說AIG裏面居然有班人，可以廢到空前絕後咁廢。賣保險畀人，可以收錢收得咁少，同時承擔咁多風險。

AIG出事都發花紅

講真，伯南克動真火唔只因佢哋廢，而係之前幾年佢哋賤賣保險時，其實係咪純粹希望年尾冇事時，之後啲花紅就袋袋平安，明知會爆個黑洞出嚟都唔理。

咁未爆前你袋袋平安，都只係可以怪自己當年冇睇清楚。不過o依家要政府注資拯救，之後你公司員工仲有花紅，就好難辯護。

雖然好難，不過你都仲會辯護話：「有啲部門冇事兼賺錢，冇理由唔畀嗰啲部門。」

係，有錢賺嘅部門有花紅可以接受，因為冇佢哋，間銀行仲傷。

不過大家知唔知，嗰一個輸爆AIG，喺倫敦嘅幾十人部門，依家都仲會派花紅。

咁都得，除非你都有得收花紅，唔係你都會掟電話。