CIT

今時今日啲花旗國金融機構嘅命途，真係有人今朝要執笠，又有人漏夜賺大錢。

孫柏文睇高盛業績，係好勁。咁呢邊廂高盛勁時，個邊廂就有CIT就死得。

金融機構輸錢唔使死，要去到執笠田地，永遠都係馬多夫個隻，即係好多個煲水滾，不過唔夠煲蓋。

百年老店執笠牽連大

百年老店CIT，一路以來用佢哋嘅江湖地位，以平息借短債，跟住掉轉頭放債。不過佢哋家陣應冇能力借新錢還舊債，因已被信貸市場判死刑。

CIT執笠關香港人咩事？CIT喺花旗國專做中小企生意，借錢畀超過30萬個零售商。試問特區又有幾多公司同花旗國做生意，當中又有幾多花旗國客戶靠CIT放數周轉？

冇錢周轉，又點還錢畀香港出口商？

佢哋話有人救，個CEO仲被封為神，不過你估CIT放咗嘅債未來表現會點？到時一樣冇錢，資不抵債。

有急單？收數時goodluck囉！