Monday, November 30, 2009

點解仲未救杜拜?

上星期,中東阿拉伯聯合酋長國中一個酋長國杜拜,宣布佢哋嘅債務,暫時唔還住。消息一出,原本第一日都好似冇乜特別,港股在上周四都只係跌幾百點,點知到上周五就好似反應遲鈍咁跌成千點。

相信大家都將注意力,集中喺呢單消息身上,想知牽連有幾大。特別係點解港股反應會咁遲鈍。

其實,杜拜宣布唔還錢,唔係新聞焦點所在。佢哋近月來,都已經陸續有宣布向供應商等拖數,所以佢哋話可能暫時唔還錢。係預期之內。因為大家都知,雷曼兄弟後,有大債仔出事,必定有人救。一有人話冇錢還,啲債主只要買定花生,就可以等白武士出手相救。亦解釋到點解消息傳出後第一日,港股都只係跌幾百點。

點知,事件嘅新聞位,喺之後嗰日發生!當啲債主等緊白武士出現時,平時會即刻宣布救杜拜嘅姊妹酋長國阿布扎比,就唔似啲債主預期咁樣,反而話唔會無限量支持杜拜。唔係即刻救?港股即時跌一千點!

杜拜一宣布完唔還錢,就走去放長假。天下記者們都搵唔到啲官解話,傳媒統稱為「資訊真空」。咁做當然即時被批評處理手法「混亂」,講到杜拜官員唔知自己做緊乜。如果你咁諗,就大錯特錯。

我相信,杜拜啲官其實係特登炮製呢個局面出來,迫阿布扎比救佢。不過出到呢招,真係落重藥,阿布扎比真係好唔想救杜拜,杜拜先咁做。

點解以前救,依家又唔救?筆者呢幾日睇到最合理解釋係因地緣政治先未救杜拜。更重要係花旗國想郁伊朗。咁關酋長國姊妹咩事?

阿布扎比係花旗國喺中東其中一個最大嘅盟友。但杜拜嘅金融業就做好多伊朗人生意,多成點?杜拜機場單一最多航班往來嘅國家就係伊朗。

當花旗國要經濟制裁伊朗時,伊朗人只要到杜拜開戶口,就可繞過制裁關卡。所以要有效制裁伊朗,必要杜拜合作。問題係伊朗人嘅生意好做,杜拜當然唔想放棄,平日風平浪靜時,迫都冇得迫。不過,今次佢哋出事,就係要杜拜合作之大好良機。

咁嘅情況下,杜拜唯有反枱,玩鋪大。如果債主銀行冇散貨,手上最多杜拜債券,即最受影響嘅銀行就係英國的銀行。英政府已出錢幫緊佢哋,所以一定好想快啲解決。杜拜知道奧巴馬好快要宣布阿富汗要增兵,如果英國突然喺阿富汗唔玩,奧巴馬好大鑊,所以就出呢招。

至於究竟點炒呢個市?都係睇美元。六個月來,每次美匯指數升到50日平均線時,美元就會回落,即其他資產價升。你可能同我一樣唔信技術分析,不過,當人人都係咁炒時,有人話齋,有智慧不如趁勢。美匯升唔穿50日平均線,個市都係要升。

Wednesday, November 25, 2009

內地鬧氣荒 大手買中電?

好多年前,又到8月尾內地石油上市公司嘅業績公布期,孫柏文又喺某金鐘五星級酒店嘅大禮堂內,參加一場又一場公司管理層搞嘅分析員發布會。

如果你聽外國例如花旗國上市公司嘅分析員發布會,你會留意到啲分析員好惡。不但如港式記者遇港官嗰隻窮追猛打,如果公司達唔到之前講過嘅預測時,更加會係咁鬧。最勁係有啲分析員甚至會在場直插管理層,話佢哋嘅經營模式唔會掂,之後仲掉轉頭教番管理層點做生意。

香港就唔同,分析員同公司管理層嘅關係,有如中學風紀(prefect)同老師一樣,斯文好多。

咁嗰次我去嘅分析員發布會,就係中海油(883)搞嘅。指定動作係先由公司講解一下業績,之後由分析員發問。由於嗰次業績並冇驚喜,油價升、產量升、盈利自然升。

當到了發問時,又出現了一啲填鴨式教育高級產物會問嘅問題,差不多全部都圍繞中海油想搞嘅天然氣海路進口生意。其他分析員就問例如:「新項目進度如何?」「同天然氣供應商傾成點?」

咁我當時其實已決定創業搞衣物生意,諗住好快永久地離開金融業,所以就趁呢個「最後機會」,問咗一條我想問好耐嘅問題:「傅總,天然氣冇得加價,根本冇乜錢賺,仲搞來做乜?淨係天然氣海路進口站,每個都幾十億美元,不如全心做石油生意啦!」

中海油董事長傅成玉當時就好行咁答話,油價未必會繼續上升,所以要分散吓風險。點都好,中海油最後都冇搞呢啲海路輸入天然氣業務。

點解要同大家分享這個問題?相信大家都知道,內地依家鬧天然氣荒,以上故事就論盡問題所在。

第一,冇得加價,係因發改委長期壓價,唔似成品油咁貼國際市價。點解會咁?因為天然氣冇得走私。成品油係液體,易運輸,唔使經幾十億入口站,所以一旦內地成品油價大脫節,就會有走私機會。

一冇得加價,就冇錢賺。雖然短暫好似益老百姓,不過就會導致公司唔投資,冇新氣田、新管道、新供應,用戶又會唔珍惜。最後出現氣荒。

不過,唔使驚!呢個情況都仲有投資機會。根據環境局長邱騰華話,2013年開始就會用「西氣東輸」嘅氣,不過會夠氣咩?你估喺廣東東江咁近搭啲水管過來?新疆呀!哈薩克呀!

好,內地冇氣即香港冇電。政府點搞呢?一係繼續用煤炭,一係就用海路輸入天然氣。

至於海路輸入,即要用幾十億美元投資起氣站。邊個起?電公司!咁幾十億美元投資乘利潤保證計劃,就算減回報百分點,都係多好多盈利。所以內地鬧氣荒,真係分分鐘要大手買中電控股(002)!

Monday, November 23, 2009

金價破高位全因香港?

金甲蟲,係中文翻譯英文gold bug一詞而來,係一個用來形容熱愛黃金嘅人。佢哋熱愛嘅程度,直情似發燒,因英文bug一字,係有被病毒感染嘅含意。

不過,只深愛黃金,係不足以成為金甲蟲,因除咗愛金之外,一定同時要仇恨紙幣先得。嗰種程度嘅仇恨,係來自覺得印銀紙嘅各國央行,特別係花旗國聯儲局,秘密地運用通脹將儲錢者擁有嘅購買力,慢慢偷去。

佢哋覺得,如果唔係投資,純粹想保護購買力,唯一方法就係買一隻冇得亂發嘅貨幣,即黃金。佢哋又話,為咗令世人「棄金擁紙」,紙幣制度下嘅既得利益集團,會無所不用其極咁出術。

點出術?例如喺期貨市場長期冇貨喺手,都大額拋空。質低金價,令你覺得金冇運行。點解冇貨喺手,都可大額拋空?因為當你買咗,不過唔攞貨,佢就可以無限量咁賣。所以金甲蟲一直都話唔好買好多銀行都賣嘅「紙上黃金」。

好喇,到你買咗又要提貨時,就會出現一拖再拖現象。市場傳聞,話有啲歐洲銀行,因客戶要提取以公斤計嘅黃金時,因冇貨要向央行求救。當所有客戶得知原來啲拋空咗嘅銀行,根本冇貨時,就會「擠提」黃金。

大家可能會話:「擠提喺08年都發生過,嗰次都冇事使乜驚?」上次冇事,係因擠提銀紙,央行一開印刷機「無限量支持」就冇事,不過如果客戶係要擠提黃金,真係嘔都嘔唔到出來。

不過,最近孫柏文聽到一個消息,令我好不安。因為金甲蟲嘅安全底線,就係只要實貨黃金一袋落袋就冇事,不過如果啲金係假嘅,點算?

外國金甲蟲圈今期嘅熱門話題,就係用鎢(Tungsten)做餡,出面有層薄金嘅假金條。聽聞呢批400安士嘅金條,喺香港被鑑證師揭發,全數大約係5,000條,總重60公噸。而佢哋又提供咗個事件時間表,今日同大家分享。

09年中,傳聞香港政府為籌備機場金庫開幕,向啲幫我哋存貨嘅外國歐洲銀行要求提貨。

之後同年的9月,銀行冇貨要周圍撲(金價亦因此升破歷史高位),最後要英倫銀行出手先夠貨。

09年10月,鑑證師喺香港為一批大額金條做鑑證時,則發現大批假貨,貨源來自西方世界。另外,香港政府亦冇再提黃金或金庫一事。

為咗平息呢啲令人擔心嘅疑慮,我建議財政司司長曾俊華、香港金融管理局總裁陳德霖等財金高官,回答以下問題。

第一,香港儲備究竟有幾多黃金?第二,啲金現放喺邊度?第三,喺香港嗰啲有冇我哋自己驗證過?第四,可唔可以將啲金條嘅編號公開?等我哋睇吓有冇同出面啲「問題金」重疊。謝!

Sunday, November 22, 2009

滙控盈利將創歷史新高?

「紅底股!又番去100蚊啦!花旗國交易時段嘅預託證券價令人振奮呀!」呢排見到滙豐控股(005)嘅股東,實在太似一個逆子,不過個仔到最後都識回頭一樣。

佢哋呢種興奮,感染力甚強,連孫柏文都想買番手,加入佢哋呢個粉絲會(fans club),好似啲歌迷會成員咁玩麻木崇拜。不過,當然最後冇,因為滙控股價反映緊未來,實在要身體有化學劑影響,先鯁得落。

大家可能話:「大把名牌股,例如比亞迪(1211)、騰訊(700),甚至你隻愛股中油香港(135)都升到比恒指32,000點時更高嘅股價。滙控當年冇份癲,一路長期喺130至150元之間,依家先升番100蚊,應該仲有得升!」

如果你咁講,就忘記咗今年滙豐控股,曾經12股供5股集資,當時對股價嘅影響。

大家要記得,2007年係滙控最賺錢嘅一年。股東應佔盈利差不多200億美元(約1,560億港元),用當時嘅總股數去除,就計到每股盈利。

不過,經過12供5之後,總股數照計就多咗42%,即使滙控總盈利能夠重返07年時的水平,每股盈利都跌三成。

如果用番07年140元股價時嘅市盈率計,每股盈利跌三成的話,股價就要打七折。咁140元打七折係幾多皮?應該係98元,即噚日嘅收市價。

大家仲要謹記嘅係,呢個只是假設盈利,能夠重返07年歷史最高水平,同埋未有海嘯前嘅市盈率。你都咪話滙控的股東唔樂觀。

當然,股價要升,唔使靠盈利上升,市盈率發大就得。如果以07年盈利,就算攤薄咗股數,用比亞迪超過100倍市盈率去計,滙控見1,000蚊一股都得!

不過,市盈率係反映市場對公司前景有幾樂觀。增長快、派息穩定、運作透明度高等,都能令投資者肯付出多啲,接受比較高嘅市盈率,不過,以上條件,滙控呢幾年來有冇?股息確大減,兼且唔要你再供股已謝天謝地!

仲有,滙控盤數有幾多水份呢?多都唔使講,淨係滙控在美國的業務,有一大嚿億億聲「資產」,係啲乜嘢「因為之前蝕咗好多,所以之後唔使交咁多稅」,而唔係實實在在賺嘅資本。

我咁講,可能會令部分滙控的股東條氣有點唔順。不過,我已經知佢哋會點駁咀,佢哋一定話,滙控的發展戰略前景好,新興市場發展幾好等云云。我只可以話:「係啊!今年超過07年盈利!行政總裁辦公室搬回香港,就乜都解決晒嗎?」

最後,想買滙控股份嘅fan屎,現價係買滙控未來盈利將創歷史新高先抵買。我只可話一句,good luck!

想賭東亞被收購?

好多年前,孫柏文仲係一個喺股票行返工嘅中國石油股分析員時,有次聽隔籬嘅銀行分析員,講番一個他有份參與飯局嘅嘢。

佢話有好幾個「非李姓」嘅東亞銀行(023)高層都有出席。咁我就問:「收到咩風?」佢話有好幾個高層,都將焦點集中喺該行主席李國寶(寶baby)後代接棒能否順利。

我再問:「咁佢哋點睇?」我同事就話情況有變數,新一代接棒不但要叻,仲要因投資者俾嘅時間唔會多,所以要快快建立「掂」嘅形象。我又問:「嘩!叻都唔夠,仲要快?」同事話,當晚在座嘅高層估計,應該3年之內,東亞一定被收購,控制權亦會由「姓李」變成其他人。

電影無間道嘅陳永仁話齋:「三年又三年。」到今日已經係當時3年嘅倍數,東亞一樣照舊股權分散,不過,姓李話事。

上個禮拜,東亞股價又有異動。原因係國浩集團(053)向港交所(388)披露,佢哋買咗好多東亞嘅股票,令市場即傳遐想,會唔會好似電視劇《富貴門》咁,玩逐一股東游說,之後敵意收購。

我就話唔會發生。大家聽完後,可能會話:「國浩入股喎!仲要買成8%!國浩當年搵咗新加坡仔笨,以天價(市帳率3倍)賣道亨,依家手頭上大把現金。」係,呢個我唔會否認。同埋之前講過東亞股權分散,進軍內地又有聲有色,確實令東亞成為好多人幻想會被收購嘅對象。如果你咁諗,我就要用我支大明燈照醒你!

《黑天鵝》一書曾警告,勿信自稱有預測未來能力嘅方程式。作者話,如果有個銀仔,經過100次擲毫後,全部都係「公」,咁第101次擲「公」嘅機會率係幾多?佢話,如果問一個有統計學博士學位、天才分析員,佢一定話第101次擲「公」嘅機會率係50%,因為銀仔嘅特性就係50/50。

不過,倘問一個中五未畢業,由派信開始慢慢升職到今日做管理層嘅人,佢會話:「第101次肯定擲『公』。之前100次都係『公』,就肯定個銀仔本身有問題啦!」

東亞都係一樣,你有幾百億元買佢股票,最多都係搭順風車。就算呢部車有100個位,俾你坐足99個,最後司機位都係由姓李坐。你不但冇資格問架車去邊或開幾快,連乘客位嘅冷氣開幾度,你都冇權過問。你追入,就真係要覺得盈利上抵買先得,如果係賭收購,你就真係嘥時間。多都唔使講。如果你買到50%股權,中央派人同你講,話轉人管理,就唔俾喺內地做生意,相信你都會一切照舊。

最後提一提大家,千祈唔好炒其他「可被收購中型銀行股」。國浩就得一個,佢哋用錢買東亞,就少啲錢買其他銀行,除非你信國浩買東亞,會令其他人買其他銀行股,如果唔係千祈唔好盲樁樁。

Tuesday, November 10, 2009

戴卓爾夫人好野!Go Maggie!

我從迷債學到的教訓

金融海嘯,發人深省,孫柏文唔知大家點,不過,我就喺好多同財經、股市冇關係嘅地方,都見到可以引用從金融海嘯中吸取嘅教訓。就喺噚日,我去咗沙田馬會會所,參加早前已經報名嘅游泳比賽。呢個比賽,係馬會為啲會員搞嘅,而我見到除咗每項比賽有冠、亞、季軍之外,仲會好似格蘭披治賽車一樣,分站計分,到年尾有個全年總冠軍,所以就報名參加每站最多三場賽事。

點知去到游泳池時,就發覺原來我報名的男性15歲或以上嘅三場比賽,只得我一人參賽。大家睇到呢度,可能會戥我高興,咁仲唔三場贏晒,滿牌而歸、分數盡拿?’

不過,大家如果咁諗就錯!因為我每次去到中環畢打街、德輔道中交界,眼見雷曼產品投資者嗰種哭訴,從中吸取了教訓,所以當工作人員同我講,得我一個人比賽的時候,我就即刻問:「咩情況會令我被取消資格?」

我又想到,更「安全」嘅嘢,都要提防「黑天鵝」嘅出現。投資者千計萬計,分析投資產品中嘅輸贏機會時,就係冇計到莊家會「執笠」。

情況有如馬會可以推出新投注產品,就是買一場賽馬裏面,墮馬的機會,即係話,如果嗰場馬冇出現墮馬情況,你有落注就有錢收。

大家都知道,墮馬的機會率甚微,所以賠率亦「非常可恥」,不過,投資、投機乃姜太公釣魚,願者上釣,只要有人覺得有值博率,就有人買。

就係咁,好多追求「安全」投資的投資者,就買咗呢啲「冇墮馬債券」,買定離手,等開跑。一出閘,情況雖因金融海嘯變得動盪,不過,騎師冇事,亦冇墮馬。當入直路,馬群接近終點時,投注大堂已見滿心歡喜嘅投資者,已經排住隊等收錢。

點知場馬未跑完,廣播系統突然宣布,馬會執笠,就算場馬最終冇墮馬,結果對投資者都係「風吹雞蛋殼,財散人安樂」。所以,大家一定要切記,在生活每個環節中,「黑天鵝」可能會隨時出現。

講開體育,就要講吓旅發局冇攞東亞運飛單嘢。聽聞早喺6月的時候,東亞運主辦單位,已問旅發局要唔要飛。當時旅發局冇話要,咁主辦單位就順理成章咁,攞啲飛出街賣。

點知,當出咗會參加運動會嘅運動員名單時,旅發局主席田北俊就大聲喊話:「點解我哋冇飛?點解呀?點解呀?」田主席似乜?除咗似啲要換片嘅BB之外,就好似今年3月,冇用28元供滙豐控股(005),之後又後悔,仲要賴人嘅嗰種投資者。好彩旅發局的功能可有可無,如果俾田少搞啲有效果嘅機構,都咪話唔驚!揀佢入旅發局嗰個,我要多謝您!

(This last line was added by the editor... Which I am not pleased.)最後說回三場賽事,我都拿了冠軍,兼打破兩項大會紀錄。

Thursday, November 05, 2009

就快暴升或暴跌

升市速度,好多時會用百分比去計算。原因係如果孫柏文同你話:「恒指上個月升咗二千點!」你可能會答:「咁係由一萬點升至萬二點?定係二萬點起步計先?」

不過由3月至今嘅升市,就算用點數而唔係用百分比計算,近排個市已愈升愈冇動力。冇咗嗰種升市升到連企喺銀行內㩒機嘅師奶,㩒掣㩒到嘩嘩聲嘅氣勢。

講真,感覺上家個市有啲似6月底、7月初嗰陣。當時個市不但冇力升,恒指仲要出現「頭肩頂」呢個「已見頂」訊號,在6月1日,同該月12日的兩次收市均見18,888點之後,就開始下試。去到之前那轉嘅多次頂位,即17,500點時,就感覺上似呢刻。

點解?因為一穿支持位就會勁跌。唔穿?暴升。咁7月嗰次下試17,500點,當然實際上冇穿破該支持位。之後點?原本喺17,500至18,888點區域已長達7個禮拜,不過,最後一次試17,500點之後,只需5個交易日,便已升穿18,888點,並直奔20,000點。

禮拜一同大家講過,點解今轉50日平均線咁重要,原因係當某條線睇落似非常強勢嘅「支持」時,就會嚴重影響,以及主導投資者決定。今轉升市開始冇力時,只要下試掂吓條50日平均線,就會好似啲邊青咁,索索即「揩」。

仲有,今次又好似7月見17,500點嗰次咁,好友同淡友在支持位大打出手。同日裂口低開、V形反彈、由大升變大跌等,幾日內連續出現,成交量又同時上升。

所以種種現象總結來講,就令我覺得個市好快就會大升或大跌,亦即番鬼佬話齋:「We have to long volatility。」

咁如果穿50日平均線又怎樣?禮拜一已講過下站就係200日平均線。咁如果幾個交易日內到站,到時我估計200日平均線,可能會去到17,500點。

不過,唔穿又點?咁會好快到23,000點。到時,仲要可能因為一些已經發誓唔入市嘅投資者們,都因為貪婪忍唔住,最後一盅,最後盅晒入市(到時又會吹內地同胞買港股云云),咁就會出現最後一次勁升!

Wednesday, November 04, 2009

恒指下站17500

50天平均線,真係退後一步睇,其實只不過係每日收市時,用之前50日嘅收市價位總和,然後除50嘅一個簡單數字。原意係俾大家一個方法,撇清波幅後去睇大勢。

因為每月大約有25個交易日,50天平均線,亦即等於之前兩個月嘅平均價。

今日要講50天平均線,係因如果大家睇番好多資產嘅價格、指數走勢,都喺上周下試50天平均線。例如有代表花旗國股市嘅標普500指數、特區嘅恒生指數,又或孫柏文嘅至愛白銀等。

如果從炒賣策略來睇,近幾個月,如每次下試50天平均線時,你都夠膽入市的話,之後都可享有豐厚嘅利益。呢個策略當然唔係咩獨家貼士,今日同大家討論嘅,係恒指因由之前高位22,600點,直至於上周四,恒指跌落50天平均線21,100點時,我身邊有好多朋友,都大手買貨。

到上周五,恒指出現大幅反彈後,呢啲朋友個個都鬆毛鬆翼,大讚自己有眼光。

咁我問佢哋入市因由,問佢哋係咪覺得股票抵買,佢哋異口同聲向我發出恥笑嘅笑聲,仲反問我:「抵買?你仲睇抵唔抵買?你都應該有好多個月冇贏錢,因為你唔敢買貨。」係!我真係唔敢。

問題係,當市場嘅買家,明知唔抵買都入市時,心態就會係博博吓。唔係話佢哋唔做功課,而係話佢哋將會成為驚弓之鳥,一有咩風吹草動,一見勢色唔對,就會急速離場。亦即係炒家主導嘅市場。

雖然上周五嘅恒指,承接上周四花旗股市嘅升勢,成功大幅反彈。不過到上周五晚,標普500指數又再次大瀉,跌穿50天平均線。唔知會唔會令恒指一齊跌穿?

大家可能會問:「如果一路靠50天平均線上,又上到變炒家市,一旦穿咗會點?」咁大家就要參考吓,08年嘅油價圖。

由08年2月,大約80美元一桶油起,你每次見油價下試50天平均線買貨的話,就一路跟住炒上08年中147美元一桶嘅高位。之後一穿,差不多直線、高速落到35美元。炒家市就係咁。

如果恒指一樣,一穿50天平均線,下站應該係200天平均線。雖然冇科學根據,不過?估炒家心理就係咁。咁恒指200天平均線喺邊?咪就係喺17,500點。有貨?又唔想賣?扣好安全帶啦!

Sunday, November 01, 2009

去完先知身體好?



Apart from the title, this pic from Joe Yam's blog is presented strictly without comment (but notice where Yam's hands are...)