Wednesday, January 27, 2010

負面消息頻頻

令市場震盪嘅外圍新政策及消息,呢幾日有如飛雪般湧現。首先之前有好多人話,中央只會打壓內地樓房「炒賣」活動,即係只打壓個人基本住屋需要以外嘅需求,例如第二套房。不過,前日忽然宣布,連買家嘅第一套房,都會提高上車門檻時,個市即刻腳軟。


繼調高一套房按揭門檻,又話要再向個別銀行調高存款準備金率,降低銀行嘅槓桿,即係減銀行可放出嘅貸款額。昨日又要罰啲過度放貸嘅銀行。中央現時發消息嘅頻率,已似06年初。


當年又係要收緊經濟活動,點知搞搞下,突然宣布話所有銀行喺一個禮拜內唔可以放貸,連想周轉出糧俾員工都唔得。嚇到市場腳軟。睇個勢,我哋分分鐘到嗰刻。


跟住就繼續有關於美國聯儲局主席伯南克連任嘅負面消息。原本到周末時分,經過上星期五美市因連任表決被押後嘅急跌,市場相信啲要為伯南克連任作表決嘅參議員冇理由玩嘢,今周應有表決,點知到噚日又傳出,白宮雖然打咗好多電話俾啲參議員,都不但未夠票,仲要有原先會支持嘅議員轉軚。


孫柏文相信,市場現價係反映伯南克今周會連任成功,如果又拖,已經跌得好慘嘅股市,會進一步受壓。所以呢幾日內,每一個代表可能人口比屯門少嘅參議員,只要講句說話、打個乞嗤,都可為我哋地球另一面嘅市場帶來動盪。


大家要記得,伯南克係個對銀行先放水、後不問嘅央行行長,佢真係好多銀行、炒家嘅至愛。所以連股神巴菲特都話,如伯南克落馬,佢會減持。呢個言論,唔係靠嚇,只係理性。


再講,美國總統奧巴馬將會喺特區時間明日朝早,發表國情咨文。依家關於咨文嘅傳言不但多,仲要係互相抵觸。雖然全部都係話奧巴馬要對民主黨上周選輸麻省做啲大嘢,不過做乜嘢就分歧好大。


有啲話會大幅對中產派糖,又有傳言話奧巴馬將會宣布將所有唔係一定要使,例如非國防、醫療等政府開支減至零。因透明度低,國情咨文公布後,又會令股市不同板塊作大幅波動。


另外,富士康(2038)日前發盈警,令東亞區靠出口去發達國家市場嘅股市(如日日本股市及南韓股市)全面下跌。如國情咨文真係確定政府方向由使錢「救市」,變為減財赤,出口股必被再踩。波動,繼續。

Monday, January 25, 2010

點解麻省選舉震散股市

「麻省人民共和國」係花旗國傳媒幫東北麻省改嘅花名。點解咁叫?因為麻省一向左傾,向左程度,直迫社會主義地區,所以上星期喺麻省嘅參議院補選結果,先至咁震撼。

因為一個大大聲要求,停止印銀紙、花旗政府減開支(即保美元同唔好再「救市」)嘅右派候選人Scott Brown,由幾個月前喺民意調查落後30幾個百分點,後來以壓倒性票數贏出。右派可以喺麻省贏到,咁左派嘅民主黨就冇一個議席係安全㗎喇。

政客最驚輸掉選舉,所以市場就開始估啲議員將會180度改變之前嘅政策,採納保美元、反開支嘅新方向,所以就問:「由09年3月開始政策推動嘅升市,是否已經玩完?」

其實,花旗國經濟喺09年冇好過,比起有雷曼兄弟爆破嘅08年,消費續跌、失業率持續上升。股市上揚,全因為貨幣政策推動,即聯儲局等嘅央行印銀紙、買例如國債等資產推動所致。

只要印銀紙,經濟再差都會見到資產價格上升,市場甚至相信經濟愈差,反而愈對股市有利,因為央行可以有藉口,愈印愈多銀紙。

不過,印銀紙當然非常危險,輕則會爆通脹,重則或令市場恐慌性拋售該貨幣。聯儲局有見及此,於09年尾宣布會喺今年第一季後,停止加碼印銀紙。該消息一宣布,美元開始轉強,資產價格開始受壓。黃金由去年12月初高位1,226美元一安士,跌至1,075美元。

不過,到今年初,美國經濟數據又開始轉差,市場又期望聯儲局要食言,第一季後都要加碼救市,資產價格止跌回升。黃金由1,075美元一安士,反彈至1,161美元。

當市場人士忙住估計聯儲局主席伯南克下一步會做咩之際,美國麻省選民,就於上星期二晴天霹靂咁選咗個要減政府開支、停止印銀紙、保美元嘅參議員。

到上星期五,連伯南克自己是否能連任成功嘅參議院表決都押後,美國貨幣政策睇落動盪,不過係忽然清楚晒,就係再印銀紙,政治上將會非常難。

話雖央行行政獨立,不過獨立嘅理由係當要做啲唔受歡迎嘅決定時,如加息,政客不能過問。不過今次選舉係美國人民,為美國長遠利益,主動要求央行推啲傳統智慧話唔受歡迎嘅政策,如停印銀紙。伯南克為保烏紗,應會順應民意。

孫柏文一定要再強調,今次麻省選舉真真正正改變咗美國政府對金融海嘯嘅基本方向。由之前印銀紙、加開支、救銀行,到一個反方向。大家要問自己嘅係,如果真係唔再加碼印銀紙,美國政府減開支,銀行被矛頭直指,股市會點?其他資產價格又會如何?

連作為白銀隊長嘅我,都覺得因麻省選舉結果,貴金屬今年好難捱。各位小心。

Wednesday, January 20, 2010

一注獨沽百度?

噚日晏晝,恒生指數原本跌緊,點知市場突然傳出,內地《財經網》引述上海金融辦公室主任方星海講話,上海正嘗試俾投資者搞「個人海外投資」後,個市即刻彈。因為資金自由行又來啦!

孫柏文估唔到,只係兩日前話,07年令我哋瘋狂嘅「港股直通車」卒之出死亡證後,噚日居然傳出會復活!復活速度,快過耶穌基督,真係神蹟呀!

不過,上次瘋狂後,就搞到好多人滅亡(記得啲accumulator嗎?),所以我只可用英文講句,「fool me once,shame on you。Fool me twice,shame on me!」大家小心。

Google疑似撤出內地市場愈搞愈多謎團,包括埋我之內嘅局外人,只得一個估字。不過,不能否認嘅係,Google一聲話走,同樣做搜尋器嘅對手百度,股價則應聲飆上,由386美元(約3,010.8港元),升至467美元(約3,642.6港元)一股。



最勁嘅係,如果冇Google呢個消息,百度應該跌到七彩。原因百度喺十幾日之內,連續有首席營運長(COO)同首席技術長(CTO)離職,突然有咁多高層走,基金經理嘅本能反應,應該係先沽貨,後徹查。

Google其實冇撤出內地市場,佢哋只係話,唔會再過濾用戶搜尋結果,而如果內地政府要禁嘅話,先至會走。不過,雖然拆咗過濾器,內地未封Google。而最奇怪嘅現象,係內地網民突然發現,除用Google嘅搜尋結果「開放」咗之外,連百度都一樣。

點解呢?一個解釋係,政府冇禁冇過濾嘅Google,百度喺競爭壓力下要跟。不過,另外一個內地傳得好勁嘅解釋,就係百度一向冇搜尋科技,用百度搵嘢,佢哋只會秘密地交俾Google做,跟住過濾吓,及加廣告後,再將結果俾番用戶。所以內地網界現流行一句「Google解禁、百度失禁」。

如果Google知道有此事,一定會唔開心,因搜尋Google做、廣告費俾百度。所以今次拆過濾就一石二鳥,既能話為人權贏掌聲,又可以玩你百度鋪杰嘅。

呢個解釋,雖然有點天方夜譚,不過,表面又好似好有根據咁。試想一想,搜尋器公司內,邊個負責搜尋功能順利?仲唔係個COO同CTO?

如果你係百度啲首席乜乜長,又聽到Google就快玩鑊甘,你又會點做?

如果你信Google今次舉動,係因為以上理由,咁就要一注獨沽百度。因為依家Google同中央政府講數,結果一係政府叫百度唔好再「外判」,一係Google真係撤出,再封百度「外判」。

點都好,今次百度股價升咗咁多,又唔係冇隱憂,真係一個拋空買跌嘅好目標。

Monday, January 18, 2010

「港股直通車」卒之出死亡證

睇報道,先知07年令恒指升到32,000點嘅「港股直通車」,卒之因批文過咗「政策適用期」而正式出死亡證。我仲記得,當年總理溫家寶到中亞旅遊,朝早用咗好多時間拉筋想跑步,點知臨開步前,撞正班特區記者問問題,佢老人家一個唔高興,就喝停咗資金自由行、「港股直通車」。

不過,政策正式嘅死亡,要等到今日先因批文過期冇咗,都令我擔心。因為前特首董建華升職去咗做全國政協副主席後,唔通令中央都染上「議而不決、決而不行」嘅習慣?有批文都拖、拖、拖,呢啲係咩管治效率?冇咗「港股直通車」,我哋仲唔變孤島?

不過,直到今日,「議而不決、決而不行」,未必係特區人唔鍾意嘅管治模式。睇吓高鐵就明。反,孫柏文都反過,冇計。不過,為對沖稅務負擔可能上升,上個禮拜一我推介過廣深鐵路(525),作為「80後」泡沫爆破概念股。

結果?恒指全周跌2.88%,而廣深鐵路就升5.4%。雖然高鐵同特區上市嘅廣深鐵路冇直接關係,不過,上個禮拜一話過,啲人係會吹注資高鐵入公司概念,所以炒上。至於我睇淡嘅港交所(388),又唔見佢特別跌。

點都好,睇港匯好似有資金流走之勢,又一路緊貼7.75跌至7.76。話雖美國聯儲局可能會閂水喉,但睇聯儲局上個禮拜嘅數據,佢哋印銀紙買咗嘅嘢總值,又創新高。冇錯,即係聯儲局主席伯南克企喺個浴缸邊,同你大大聲講,話3月閂水喉,不過佢隔籬嘅水喉仲係以全速放水。

喺咁嘅情況下,就算全球最手緊之債仔─花旗政府,都冇融資時息升嘅壓力。長債息率,經過上星期額數上近破記錄之債券拍賣後,都好穩定。

到3月聯儲局閂水喉時點算?呢兩個禮拜,管理全球最大債券基金嘅公司PIMCO,都不斷派人出來警告世人,3月後長息會不斷上升,到時就會對好多舊年3月開始勁升嘅資產價格,造成好大嘅破壞。PIMCO本身由舊年中借平錢炒嘢,變成依家就算零息都揸現金嘅部署,你話跟唔跟?

要跟,就要計數。09年美財赤萬幾億元,美外貿赤字就幾千億元,貿赤即係外面包括中央同特區嘅央行多咗錢買美債。不過幾千億元係唔夠填萬幾億元嘅氹,剩番嗰啲點算?好彩,09年聯儲局買咗萬幾億嘅長債,所以長債夠需求,唔使加息口回報吸引啲錢。

不過3月後呢?就睇吓伯南克係咪真係閂水喉。

最後,加多句。作為香港人,我要向立法會財委會主席劉慧卿致敬。佢真係公平、有耐性、依規條做事,不論反對或支持高鐵嘅人,睇到都應對香港仲有咁嘅質素嘅人為市民服務而感自豪。多謝劉主席!

Wednesday, January 13, 2010

「和諧壓一切」概念股

問社會「和諧」係咪我國領導人嘅壓倒性管治方針時,孫柏文相信大家都會答:「連小朋友都識河蟹前、河蟹後啦!」


話雖如此,不過「和諧」作壓倒性管治方針,唔係我國必然嘅事。我哋嘅共和國,係一群以意識形態作號召嘅革命者,用血換番來嘅。建國之初,也自然以意識形態作壓倒性的管治方針,排政策次序「和諧」絕不行先。


到1978年鄧小平同志推改革開放後,意識形態嘅追求就開始淡化,以經濟增長作主線去達致社會「和諧」,亦慢慢佔到政策主流。


如果「和諧壓倒一切」係真,咁又有冇概念股可以炒呢?仲要係因以前意識形態打壓,行業雖有急速增長,股價因市場覺得政策有不明朗因素而有折扣,依家賣平咗呢?答案係有。


大家試諗下,胡溫領導下嘅共和國,面對單一次最「不和諧」嘅事件係咩?咪就係喺新疆想推翻主權嘅暴動。暴動,喺港英管治二十世紀六十年代,都因有人想推翻殖民政權而多次發生。咁從當年嘅事件睇,個政策教訓係乜?


根據我老竇轉述已故馬評家董驃嘅觀察,驃叔曾喺佢當年領導香港嘅清談節目《賽馬結果》中分享過,話當年暴動多數都喺夏天發生。不過一到入秋,馬季開鑼,暴動情況就會喺社會消失。


馬克思曾話過,宗教就係社會嘅鎮靜劑,不過來到我哋中國人嘅世界,根據驃叔所言,落吓注、賭兩手先係社會嘅鎮靜劑。


咁內地依家得一種賭博係合法,就係彩票,即特區人熟悉嘅六合彩式賭博。所以如果你覺得「和諧壓倒一切」係真,咁彩票股就係你要買嘅「和諧」概念股。


當然,有人擔心因政策變,彩票業會被打壓,話說八十年代廣州都搞過賽馬,後來都要執。咁我就話當年係改革開放初期,中央仲有唔少意識形態應作政策主導嘅革命者喺度,依家冇咁多。今時今日,「和諧」真係壓倒一切。


咁今時今日彩票業喺內地成交額又有幾多,據我電台拍檔火燎森話,就係大約1,000億元人民幣。係咪好勁?係。不過,大家要知道舊年我哋特區六合彩嘅投注額係64億元,即每人大約900元。


如果將數乘番13億人口,彩票業將會係過萬億元嘅市場,所以由1,000億元人民幣咁上,喺未來好多年後,仍可以繼續以雙位數字上升。政策就分析咗,數亦計過,咁你依家會點做?

Monday, January 11, 2010

「80後」泡沫爆破概念股

1976年諾貝爾經濟學獎得主佛利民(Milton Friedman),曾經話過,每日喺股市跳動嘅股價,能反應市場知道嘅訊息。甚至能反映未曾發生嘅事,上個禮拜廣深鐵路(525)嘅股價,就係一個好好嘅例子。

相信大家都知道,上個禮拜五,立法會財委會再次開會辯論關於高鐵669億元嘅撥款問題。又好似之前開會嗰次咁,法定時間「吹雞」完場時冇結果,摸和下次再來過。

都唔知係咪因為東亞運,我哋支足球隊打和踢十二碼贏波、勁興奮(high)之後,特區人對呢啲意大利足球式嘅拉布戰術,有另一番感覺。不過,又拖一拖,真算係又締造傳奇一刻。

上個禮拜五,立法會財委會開會之前,究竟會否成功再拖,問議員或市民,都應答你係未知之數。不過,睇番廣深鐵路嘅股價,就可知當日通過將會無望。因為上個禮拜四,一向唔係好波動嘅廣深鐵路股價,單日內下跌4.6%,將上個星期三股價嘅升幅,不單抹掉,仲要跌突。

有好多財經、金融界嘅朋友話齋,睇股價走勢,已經在當晚同孫柏文話,之後嗰日通過都係凍過水。真係言中。

點都好,今個禮拜五,立法會財委會又要再傾高鐵撥款問題。如果我係立法會議員,都必反對呢個669億元的方案,不過,今周通過嘅機會,將會非常高。

依家成個反對浪,傳媒講到好似得「80後」反對咁,仲要係「80後」都覺自己係,唯一一群真心反對咁,對呢班後生仔女,任何一切反高鐵嘅都係想抽水。

「80後」嘅呢種自大,對上十年見過兩次。第一次就係2000年,搞高科技嗰班,第二次就係2005、2006年啲銀行家。泡沫嘅形成,係當一啲本身真係唔錯嘅嘢,被不斷膨脹,直到膨脹過度後爆破,「80後反高鐵」,就係去到爆破嘅一點。

其實議員要問嘅問題,都已經問晒。係咪得嗰兩場爛鬼諮詢,就話做咗足夠嘅諮詢?係。係咪完全冇解決過一地兩檢的問題?係。重有好多問題,同不能接受嘅答案添,不過,要支持嘅議員,應該會照投支持票。我想再阻止都阻止唔到,到了今個禮拜五,便會有決定。

雖然高鐵係廣深鐵路母公司嘅事,不過,因為股民可以大玩注資概念,故當市場覺得高鐵再冇其他方法阻擋的時候,投資者其實又會炒番一轉。

試想一想,廣深鐵路現時市值只係約45億元,投資者眼看669億元的大幅補貼,就算高鐵日後每日客量,好似西部通道咁,係政府預測嘅十分之一,注資概念都能吹幾日。「80後」泡沫爆破概念股,今周必屬廣深鐵路。

Wednesday, January 06, 2010

一句「唔關我事」市即彈

呢兩日啲數據真係冇乜特別。咁港股就喺新一年嘅第一個交易日,全面反映呢個事實。先升後回,埋單跌少少。不過,到噚日就唔同,由頭升到尾,仲要以近全日最高位收市。

好多人即刻搵理由解釋個市點解會升。有啲人就話外圍升,因此令港股升,呢個理由我覺得冇問題,不過,點解外圍特別係花旗國會勁升?有人話係啲乜乜ISM指數好,咁孫柏文就去睇睇。一睇,就發覺ISM數據唔係特別好,冇可能因呢個數據,就能夠將個市咁樣大力推高。

其實,真正將花旗股市推高嘅元兇,又係美國聯儲局主席伯南克。基本因素根本睇都嘥時間,資金流唔啱,都係會睇錯市,甚至如果基本因素改善,令央行抽資,你睇好,就會輸得好慘。

大家可能會問:「不過呢排唔係吹緊退市風咩?又話聯儲局第一季後會縮嘅?」早前係,依家都係。不過,開年前嘅周末,伯南克被某學會邀請,講咗啲大路嘢,不過去到答問環節時,有人問佢花旗房屋泡沫時,究竟聯儲局當年嘅超低息政策應否背負少少責任。

伯南克就話:「唔關聯儲局事!低息還低息,元兇係信貸標準大跌!」

各市場參與者就係聽到呢句說話,就同自己講:「世紀大泡沫,都可以話唔關我事。咁即係面對未來大泡沫時,聯儲局係唔會諗點樣用貨幣政策去控制,而係俾泡沫形成,大家快慰後,泡沫爆破時,去搵方法卸鑊。」

咁即係如果你覺得,因資產價格失控咁升,係會令聯儲局做嘢,佢哋息唔會加、資唔會抽,不過會好努力咁搵頂級公關幫自己辯護。仲唔瞓身炒?

當然,炒嘢最開心係又快又高回報。咁我成日話最好炒嘅股票,就係大家覺得會執笠,不過最終冇事嘅公司。

咁大家會問:「咁應喺邊一刻入市呢?」就係公司證明襟撈嘅一刻。

公司被救時,往往會糟蹋被救後重組改革之機會。例如早前日本航空被救,只要佢哋唔重組改革,佢哋一樣會又出事。當然,再出事咪再搵人救,不過,救救吓就會冇人會再救。

不過,如果有一間公司,能證明自己襟撈,就可以不斷搵人救。而呢幾日最佳襟撈嘅例子,亦即可入市嘅地方喺邊度?就係杜拜。

你可能話,佢哋照將大白象高廈開幕,等於佢哋冇學到教訓。係,不過佢哋將棟大廈改名,由Burj Dubai,變成Burj Khalifa。Burj就係塔咁解,Dubai就係杜拜,咁Khalifa呢?就係救杜拜嘅阿布札比,佢哋嘅領導人。

將你最威,同俾唔起錢嘅嗰樣嘢,以你最大債主同救星命名,呢個仲唔襟撈?

Monday, January 04, 2010

2009已派花紅 2010先沽造淡

舊年個市升得好勁,升到好難相信。起碼孫柏文唔信先。我唔信可以升得咁勁嘅原因,係因為根據基本分析,我唔覺得值。

大家可以用一百幾廿個內地或花旗國的經濟數據,去話我嘅基本分析係錯的,不過,我就會用番我覺得更客觀的因素,例如汽油使用量嘅數據,去支持我的意見是正確。

其實覺得唔值嘅,除咗我之外,仲有好多我識得嘅基金經理。例如舊年第二季,佢哋好多都喺恒指見12,000點時瞓身買貨,不過,到16,000點就唔落車嘅,都會將手頭上嘅貨,大幅減持。

不過,唔似得我,佢哋雖然唔覺得值,但係大市到咗去年7月,凌厲地升穿19,000點之後,佢哋都仍然狠狠地追貨。就如曹sir,曹仁超話齋:「有智慧不如趁勢!」

去年10月黃金周後,股市開始喺21,000至23,000點之間徘徊,我就喺我啲基金經理朋友口中,感覺到佢哋行內好似達成了共識。就係09年唔好理咁多,升咗先,到年底計數,成績報告表一出,花紅亦已塵埃落定之後,先喺2010年再睇基本因素。

如果我哋喺去年的金融海嘯中吸取到教訓,其中一個不能忘記嘅,必定係金融業從業員,喺會為了花紅,做啲一些局外人覺得唔理性嘅事。話唔值?如果到了年尾都唔跌,就要追。出年先算。

咁今日就係2010年嘅第一個交易日,舊年升得咁多,今年1月相信必定出現回吐,問題只係究竟跌得多定少。

大家要記得,現在有大把藉口去沽貨,就係美元轉強之勢,似乎冇跡象顯示會停。

美匯於09年尾開始轉強時,所有資產不論金、股、匯、債,通通下跌。不過到了去年12月,其他資產續跌時,只有股市能企得比較硬淨。

其實,有好多分析員都避開呢個問題,唔直接解釋,點解其他資產喺美匯轉強時下跌,係得股票上升,佢哋淨係繼續話,因為個市合理等等,大家唔使驚。並要永遠緊記投資策略師David Rosenberg之言,即是當債市同股市唱反調之時,債市多數啱。09年已派發花紅,2010年似係先沽、造淡,之後再部署。

最後,上個禮拜有讀者問我,在千禧年代當中,咩係我覺得最厲害之新科技。我會話有兩樣,排第二就係蘋果電腦嘅iTunes,一個原先用來簡單賣歌嘅服務,變身成為蘋果iPod、iPhone雄霸移動手機之平台。諾基亞(Nokia)公司工程師諗到嘅功能,加上有千千萬萬個獨立開發員工幫蘋果寫程式,做到你有嘅佢有晒,你冇嘅,佢都有埋。

不過,孫柏文認為,最勁之新科技,從我自己的使用量來睇,一定係YouTube。咁你哋係唔係都一樣?

Friday, January 01, 2010

今年失了手之建議

今年5月13日,孫柏文喺某媒體建議過「一注獨沽港交所」。當時恒指為17,000點,而港交所(388)就賣緊110元一股。呢個睇淡建議嘅目標價,就定咗喺62.85元,有效期亦至今年最後一日,即明日。呢個建議,亦係我09年,唯一的投資建議。


今日係12月30日,除非呢兩日有好多超級悲劇同時發生,我諗我嘅建議都錯硬,仲要錯得非常離譜。錢,就輸咗,係時候做賽後檢討。


我建議之日,提供點解睇淡理由,就有兩個。當時我覺得港交所喺提出建議之前短短兩個月,由低位升過一倍,第一因大量資金流入特區,同大家預期流向會繼續,第二就係疑似經濟春筍。


咁當時,首先我覺得資金好快就會好勁咁流走,第二就係春筍其實係中國刺激經濟措施。而因港交所之前嘅升浪實在太誇張,所以就建議「一注獨沽港交所」。


咁呢兩個理由,最後點?睇番5月時特區嘅銀行結餘,就由當時嘅水浸,演變成依家挪亞方舟嗰隻聖經式水災。即係資金不但止冇走,仲愈來愈有。


咁點解我睇錯資金流?因為我患咗典型分析員睇歷史估未來嘅職業病。當時銀行結餘同資金流,已達破紀錄之勢,以經驗來睇,冇理由能長期保持咁高嘅水平,更唔會愈來愈多。點知真係咁。


所以,第一個教訓就係喺今次嘅金融海嘯下,以前係點點點,唔可以再作準。試問,海嘯之下,滙豐控股(005)唔係好好,第一次盈警、第一次因資本不足要供股等。07年初問你,兩年之內滙控會先發盈警又供股,你分分鐘會答:「唔好玩啦!以前都未試過。」


咁中國帶頭嘅經濟復甦又點?內地經濟數據我一路都唔信,有時會大幅報大,有時又會報細數,所以我都係信啲比較客觀嘅數據。例如除非短炒估市場情緒,我係唔會睇GDP數據,不過,我會睇石油進口,同副產品使用量,同賣車數據。


咁點?睇GDP,就話好勁,經濟復甦。不過,如果睇賣車同石油數據,就好多車落地,但油就冇用多咗。即係借錢買車易,搵錢養車難。經濟復甦?No。其實都只係信貸發大。不過點都好,錯就係錯。至於我依家對港交所點睇?都仲係一注獨沽港交所!邊度值百三蚊股呀!